Jyldyń basynda volonterlik uiymdar sany shamamen 200 bolsa, jyl sońyna qarai volonterlik baǵytta jumys isteitin toptar sany 675-den artty.
Bul týraly búgin «Birgemiz» respýblikalyq front-keńsesinde ótken volonterlerdiń beiresmi kezdesýinde aityldy, dep habarlaidy QazAqparat.
«Birgemiz» respýblikalyq front keńsesiniń basshysy, «Ulttyq volonterlik jelisiniń» atqarýshy direktory Tatiana Mironiýk búgin volonterlerdiń beiresmi kezdesýi ekenin aitty.
«Volonterler jyly resmi túrde jabyldy. Ár senbi saiyn volonterlik qyzmettegi koordinatorlar úshin beiresmi kezdesý uiymdastyrylady. Kezdesý barysynda volonterlerdi qalai tartýǵa bolatyny, is-sharalardy qalai uiymdastyrý kerektigi týraly máselelerdi talqylaimyz. Volonterlik osy ýaqytqa deiin de bolǵan, keiin de bolady. Biylǵy «Volonterler jyly» osy baǵyttaǵy jumystardy retteýge bolatyn joldardy kórsetti.
2016 jyly Volonterlik qyzmet týraly zań qabyldanǵan bolatyn. Kelesi jyly osy zańǵa volonterlik qyzmetti damytýǵa kómektesetin ózgertýler men tolyqtyrýlar engiziledi. Bolashaqqa qatysty josparymyz kóp. Aimaqtarda jumys isteitin front-keńselerdiń jumysy jalǵasa beredi. Biyl elimiz boiynsha 180 myńnan astam volonter jumysqa tartyldy. Bul resmi statistika. Jumysqa tartylǵan volonterlerdiń sany budan da kóp dep oilaimyz. Sebebi esh jerde tirkelmegen volonterlik toptar bar, sondai-aq ózin volonter dep atamaityn, biraq qoǵam igiligi úshin qaitarymsyz negizde jumys isteitin adamdar kóp. Osylardyń bárin qosqanda 180 myńnan asatyny sózsiz. Jyldyń basynda volonterlik uiymdar sany shamamen 200 bolsa, jyl sońyna qarai volonterlik baǵytta jumys isteitin toptar sany 675-den artty. Bul – óte jaqsy kórsetkish», - deidi Tatiana Mironiýk.
Kolledj stýdenti Syrymbet Januzaqulynyń volonter bolyp júrgenine 3 jyl bolǵan.
«Alǵash ret EXPO-2017 halyqaralyq mamandandyrylǵan kórmesi ótken kezde volonter boldym. Bul usynysty ápkem aitqan edi, keiin volonter bolýǵa degen qyzyǵýshylyǵym arta tústi. Ázirge konferentsiia, forým uiymdastyrýshylaryna kómek kórsetýdemiz. Bolashaqta áleýmettik, ekologiia salasyna qatysty volonterlikpen de ainalysamyn degen josparym bar. Búgin Ulttyq volonterlik jeli koordinatorlarynyń oqýy bolyp jatyr. Pandemiiaǵa bailanysty jumysymyz biraz toqtap qalǵan, al negizinde aptasyna bir ret osylai bas qosyp, oqý jumystaryn júrgizemiz. Osymen úshinshi apta kezdesip otyrmyz», - deidi «Qarjy akademiiasy» AQ kolledjiniń 2-kýrs stýdenti, volonter Syrymbet Januzaquly.
