Jyl basynan beri elge kelgen 6935 qazaq «qandas» mártebesine ie boldy. Olardyń ishinde 404 qandas Qazaqstan azamattyǵyn aldy, dep habarlaidy "Ult aqparat" «Otandastar» qoryna silteme jasap.
«Jalpy 1991 jyldan beri respýblikaǵa 1 mln 77,3 myń etnikalyq qazaq oraldy. Qazaqstanǵa kelgen qandastardyń jartysynan kóbi, iaǵni 76,3% - Ózbekstannan kelse, 10,4% – Qytaidan, 6,2% – Túrikmenstannan, 2,7% – Mońǵoliiadan, 1,2% – Qyrǵyzstan, 0,5% – Iran, 0,3% – Aýǵanstan jáne qalǵan 2,5% basqa elderden qonys aýdarǵan», - delingen «Otandastar» qorynyń habarlamasynda.
Elge kelgen etnikalyq qazaqtar negizinen Almaty, Túrkistan, Mańǵystaý jáne Jambyl oblystaryna, sondai-aq Shymkent qalasyna qonystanǵan.
«2019 jyly 17 661 etnikalyq qazaq nemese 9 993 otbasy tarihi otanyna oraldy jáne qandas mártebesine ie boldy. Elimizde jyl saiynǵy qandastardy qabyldaý kvotasy toqtaǵan joq. 2019 jyly QR Úkimetiniń qaýlysymen qandastardy qabyldaýdyń óńirlik kvotasy 2031 adam boldy.
2020 jyly 13 myńnan astam etnikalyq qazaq «qandas» mártebesin aldy.
Ótken jyly Qazaqstanǵa kelgen qandastardyń jartysynan kóbi (53,1%) - QHR-dan, 31,3% – Ózbekstannan, 8,7% – Túrkimenstannan, 3,7% – Mońǵoliiadan jáne 3,3% - basqa elderden kelgen.
Olar negizinen Almaty, Mańǵystaý jáne Túrkistan oblystarynda, sondai-aq Nur-Sultan jáne Shymkent qalalarynda qonystandy.
2020 jyldyń qorytyndysy boiynsha eńbekke qabiletti jastaǵy qonys aýdarýshylar sany 57,1%, eńbekke qabiletti jastan kishi 31,9%-dy jáne zeinetkerler 11%-dy quraidy», - deidi qor.
2021 jylǵy 1 maýsymdaǵy málimet boiynsha, elimizde 6935 adam «qandas» mártebesine ie boldy. Olardyń ishinde 404 qandas Qazaqstan azamattyǵyn aldy.
«2021 jylǵa arnalǵan qandastardy qabyldaýdyń óńirlik kvotasy 1 426 adamǵa josparlanǵan: Aqmola oblysy – 258 adam, Qostanai oblysy – 350 adam, Shyǵys Qazaqstan oblysy – 195 adam, Soltústik Qazaqstan oblysy – 123 adam, Pavlodar oblysy – 500 adam», - deidi «Otandastar» qory.
