Foto: Gov.kz
2024 jylǵy 1 shildedegi jaǵdai boiynsha erikti qonys aýdarý sheńberinde jumys kúshiniń utqyrlyǵyn arttyrý úshin jumys kúshi artyq óńirlerden jumys kúshi tapshy óńirlerge 4 869 adam, onyń ishinde 1 891 qandas jáne 2 978 qonys aýdarýshy kóship keldi, dep habarlaidy "Ult aqparat" Eńbek jáne halyqty áleýmettik qorǵaý ministrligine silteme jasap.
Barlyq qonys aýdarýshylarǵa memlekettik qoldaý sharalary kórsetildi. Osy jyldyń sońyna deiin 9483 adamdy kóshirý josparlanýda.
"Qonystandyrý óńirleri bólinisinde Pavlodar oblysyna — 2 036 adam, Soltústik Qazaqstan oblysyna — 1 163 adam, Qostanai oblysyna — 540 adam, Shyǵys Qazaqstan oblysyna — 402 adam, Abai oblysyna — 362 adam, Aqmola oblysyna — 285 adam, Qaraǵandy oblysyna — 43 adam, Ulytaý oblysyna — 38 adam qonys aýdardy.
Qonystaný aimaqtaryna kóshken qandastarymyz negizinen Ózbekstannan — 631 adam, Mońǵoliiadan — 616 adam, QHR — 472 adam, Reseiden — 110 adam, basqa elderden — 62 adam kelgen", — dep jazdy Eńbek jáne halyqty áleýmettik qorǵaý ministrliginen.
1 491 eńbekke qabiletti qonys aýdarýshy men 944 qandastyń 1 288-i jumysqa ornalastyryldy, 111 adam kásipkerlik qyzmetpen ainalysady, 1 adam biznes ashý úshin grant aldy.
Qonys aýdarýshylar men qandastar densaýlyq saqtaý, aýyl sharýashylyǵy, bilim berý jáne ónerkásip salalaryna jumysqa ornalasty.
Qonys aýdarǵan keiipkerlerimizdiń biri — Kópbaevtar otbasy, olar qonys aýdarǵannan keiingi ómirlerindegi oń ózgeristerimen bólisti.
"Biz óńirlik qonys aýdarý kvotasyna 2024 jyly qosyldyq. Jetisý oblysynyń Taldyqorǵan qalasynan Abai oblysynyń Aiagóz qalasyna kóship keldik", — dedi Raýan Kópbaev.
Raýan I.Jansúgirov atyndaǵy Jetisý memlekettik ýniversitetin «Qarjy jáne nesie» mamandyǵy boiynsha bitirgen. Jańa turǵylyqty jerine kelgennen keiin ol memlekettik mekemege bas býhgalter bolyp jumysqa ornalasty.
Raýannyń jubaiy buryn «Bastaý mektebi» JShS-de ofis-menedjer bolyp jumys istegen, al qazir dekrettik demalysta. Ol "Bastaý biznes" jobasy boiynsha kásipkerlik negizderine oqytýdan ótip, óziniń biznes-jobasyn sátti qorǵady. Jazda Kópbaevtar otbasy óz isin ashý úshin 1 mln 476 myń 800 teńge kóleminde jańa biznes-ideialardy iske asyrýǵa arnalǵan grant iegeri atandy.
"Biz kópten beri bódene ósirý kásibin jolǵa qoiýdy oilastyryp júrgenbiz, endi mine oiymyz júzege asqaly otyr. Bólingen qarajatqa inkýbator, brýder, aýa baptaǵysh, tońazytqysh, muzdatqysh jáne jeldetý júiesin satyp alǵaly otyrmyz. Biz memleket tarapynan osyndai qoldaý sharalary kórsetilip jatqanyna dán rizamyz", — dep bólisti Raýan.
Esterińizge sala keteiik, erikti qonys aýdarý aiasynda qonys aýdarýshylarǵa memlekettik qoldaýdyń mynadai sharalary usynylady:
- — otaǵasyna jáne otbasynyń árbir múshesine 70 AEK mólsherinde kóshýge arnalǵan bir rettik sýbsidiia;
- — otbasy músheleri sany men eldi mekenge bailanysty 15-ten 30 AEK-ke deiingi mólsherde 12 ai ishinde turǵyn úi jaldaýǵa jáne kommýnaldyq qyzmetterge aqy tóleýge ai saiynǵy sýbsidiialaý;
- — qysqa merzimdi kásiptik oqytýǵa joldama;
- — jumysqa ornalasýǵa nemese kásipkerlik bastamany damytýǵa járdemdesý;
- — ekonomikalyq utqyrlyq sertifikattaryn berý.
Budan basqa, óńiraralyq qonys aýdarýǵa járdem kórsetetin jumys berýshilerge turǵyn úimen qamtamasyz etilgen jáne keminde 2 jyl merzimge turaqty jumysqa qabyldanǵan árbir qyzmetker úshin 400 AEK mólsherinde jumysqa ornalasýǵa birjolǵy sýbsidiia beriledi.
