Jyl basynan beri elimizde 2700-den astam áiel daǵdarys ortalyqtaryna jiberildi. Bul týraly QR IIM Ákimshilik politsiia komitetiniń basqarma basshysy Áset Ospanov málim etti, dep habarlaidy QazAqparat.
«Áielderdi zorlyq-zombylyqtan qorǵaý maqsatynda arnaiy inspektorlar jumysyna erekshe mán berildi. Memleket basshysy ulttyq qoǵamdyq senim keńesiniń otyrysynda atalǵan sala inspektorlarynyń sanyn kóbeitý kerektigin aitty. Búginde ishki rezervter esebinen olardyń sany eki ese artty. Qazir elimizde áielderdi zorlyq-zombylyqtan qorǵaý salasynda 248 inspektor jumys isteidi. Sonymen qatar atalǵan laýazym endi árbir aýdandyq politsiia bólimshesinde bar», - dedi Áset Ospanov Ortalyq kommýnikatsiialar qyzmeti alańynda ótken baspasóz máslihatynda.
Onyń aitýynsha, zorlyqqa tap bolǵan, jábirlenýshilerge zańgerlik, psihologiialyq jáne áleýmettik kómek kórsetiledi.
«Zorlyq-zombylyq qurbandaryn áleýmettik ońaltýǵa arnalǵan 49-ǵa jýyq daǵdarys ortalyǵy jumys isteidi. Biyl politsiia qyzmetkerleri ómirlik qiyn jaǵdaiǵa tap bolǵan 2700-den astam áieldi daǵdarys ortalyqtaryna ornalastyrdy. Olardyń 716-sy ýaqytsha baspanamen qamtyldy. Sol sekildi áielder men balalarǵa qarsy jasalǵan qylmysty betin ashatyn arnaiy tergeýshiler jumys isteidi. Iaǵni barlyq politsiia departamentteri janynan jedel-tergeý toptary qurylǵan. Onyń quramynda 280 tergeýshi áiel bar. Osy oraida eskeretin jait, jábirlenýshiler áiel tergeýshige kóbirek senim artady. Bul zorlyq-zombylyqtyń betin ashýdyń tiimdiligin arttyrady», - deidi ol.
