Biyl Qarmaqshy aýdanynyń qurylǵanyna 90 jyl tolyp otyr. Mereitoiǵa orai Qorqyt Ata memorialdyq kesheninde merekelik shara uiymdastyrylyp, aýdan ortalyǵy Josaly kentinde «Qarmaqshy» kitabynyń tusaýkeseri ótti.
Qarmaqshy aýdanynyń 90 jyldyq mereitoiyn atap ótýge oblys ákimi Qyrymbek Kósherbaev pen Qarmaqshyda týyp-ósken qoǵam qairatkerleri jáne aýdan turǵyndary qatysty.
Aimaq basshysy qarmaqshylyqtardy mereitoimen quttyqtap, aýdannyń oblystyń áleýmettik-ekonomikalyq jáne rýhani-mádeni damýyna qosqan úlesin atap ótti.
«Qarmaqshy aýdany - barsha túrki jurtynyń abyzy, danagói Qorqyt Ata mekeni, Syr óńirindegi ejelgi astanalardyń biri – saqtardyń ordasy Shirik Rabat shahary ornalasqan qasietti jer. Balqy Bazar, Dúr Ońǵar, Jienbai jyraý, Eshniiaz sal irgesin qalap, Kete Júsip, Shoraiaqtyń Omary, Turmaǵambet Iztileýov kúmbezin kótergen jyr kerýeni - Qarmaqshy jeriniń «Júz shaiyr eli» atalýyna sebep boldy. Jaqyn arada Qyzylorda qalasynda aimaǵymyzdyń, onyń ishinde Qarmaqshy aýdanynyń mádeni murasyn zamanaýi deńgeide dáriptep, nasihattaý úshin aimaqta Qazaq dástúrli óner akademiiasyn ashýdy josparlap otyrmyz», - dep habarlady oblys basshysy ««Qarmaqshy – eldik pen erlik mekeni!» ǵylymi-tanymdyq konferentsiiasynyń barysynda.
Odan bólek, Qarmaqshy aýdanynan shyqqan ult maqtanyshtary Ekinshi dúniejúzilik soǵysqa qatysqan jaýynger aqyn Ábzáli Egizbaev, Keńes Odaǵynyń Batyry Táiimbet Kómekbaev, Sotsialistik Eńbek Erleri Tsai Den Hak, Ádilbek Hairýllaev, Sálima Jumabekovalardy da atap ótken jón.
Sondai-aq, konferentsiiada «Qarmaqshy» kitabynyń avtorlary – filologiia ǵylymdarynyń doktory Baǵdat Káribozuly men tarih ǵylymdarynyń kandidaty Ázilhan Tájekeev, Qarmaqshy aýdanynyń Qurmetti azamattary – Baqbergen Dosmanbetov, professor Temirhan Tebegenov, jyraý Almas Almatov baiandama jasady.
Shara barysynda oblys ákimi Qyrymbek Kósherbaev T.Kómekbaev, Iirkól jáne Qýandariia aýyldyq okrýgtarynyń sharýashylyqtaryna kógaldandyrý jumystaryna arnalǵan arnaiy tehnika – traktorlardyń kiltin tabystady.
Sonymen qatar, búgin Qarmaqshy aýdanynda respýblikalyq aqyndar aitysy, ulttyq sport túrlerinen saiystar, Iran-Ǵaiyptyń «Qorqyttyń kóri» spektakliniń kórsetilimi jáne ortalyq alańda merekelik gala-kontsert uiymdastyrylatyn bolady.
