QR SIM resmi ókili Aibek Smadiiarov Qazaqstan azamattaryn Siriiadan evakýatsiialaýǵa bailanysty gýmanitarlyq operatsiia jalǵasatynyn aitty, dep habarlaidy QazAqparat tilshisi.
«Ózderińizge málim, osy jyldyń eń basty jańalyǵy - Memleket basshysynyń tapsyrmasymen iske asyrylǵan «Jýsan» operatsiiasy boldy. Ol operatsiianyń mán-jaiy Syrtqy ister ministrliginiń arnaiy brifinginde aityldy. Operatsiia sheńberinde 47 azamat Qazaqstanǵa jetkizildi. Onyń otyzy 1-5 jas aralyǵyndaǵy sábiler», - dedi Aibek Smadiiarov.
Onyń aitýynsha, elge ákelingen sábilerdiń kópshiligi Siriia aýmaǵynda dúniege kelgen. Sondyqtan, bul operatsiianyń basy ǵana, ol jalǵasyp jatyr.
«Bul operatsiia áli jalǵasady. Biraq, mán-jaiyn tolyq aita almaimyz. Óitkeni bul operatsiiada bizge halyqaralyq uiymdar men seriktester kómektesip jatyr. Sol sebepti kóp aqparat áli jumys babynda. Túsinýshilik tanytýdy suraimyz», - dedi ol.
Eske sala ketsek, Qazaqstan Prezidenti Nursultan Nazarbaev Qazaqstan azamattaryn Siriiadan evakýatsiialaýǵa bailanysty málimdeme jasaǵan bolatyn. Memleket basshysy óz sózinde atap ótkendei, 6 qańtarda quqyq qorǵaý organdary men Syrtqy ister ministrligi júrgizgen gýmanitarlyq shara nátijesinde Siriiadan 47 azamatymyz, sonyń ishinde 30 bala elimizge qaitarylǵan
