Júrýge jaramsyz bolyp qalǵan kólikke salyq tólemeý úshin ýákiletti organdardyń memlekettik tirkeýinen shyǵarý qajet, dep habarlaidy QazAqparat.
Bul týraly Memmlekettik kirister komitetiniń Óndiristik emes tólemderdi ákimshilendirý basqarmasy basshysynyń orynbasary Oljas Otar Ortalyq kommýnikatsiialar ortalyǵynda ótken brifingide aitty.
«Biz bir jaǵdaidy túsinip alýymyz kerek. Kóptegen qazaqstandyqtardy mazalap júrgen máseleniń biri osy. Kólik jaramsyz bolyp qalǵan jaǵdaida da ol ishki ister organdarynyń memlekettik tirkeýinen shyǵarylmasa, salyq esepteledi. Tirkeýden shyǵarylǵanǵa deiin júrse de, júrmese de salyq esepteledi», - dedi komitet ókili.
Mamannyń aitýynsha, isten shyqqanymen tirkeýden shyǵarylmaǵan kóliktiń salyǵyna qatysty shaǵymdar vedomstvoǵa jii túsedi eken.
«Kóptegen azamattardan aryz, shaǵymdar túsip jatady. «Bálen jyl buryn jaramsyz bolyp qalǵan, úidiń aýlasynda qańyrap bos turǵan kólik úshin nege salyq tóleýim kerek» dep jatady. Salyq zańnamasynda bul másele anyq jazylǵan. Memlekettik tirkeýden shyǵarylǵanǵa deiin siz salyq tóleýge mindettisiz. Osy efirdi paidalanyp salyq tóleýshilerge aitqym keledi. Eger attaryńyzda jaramsyz bolyp qalǵan kólikter bolsa, erterek ýákiletti organdardyń esebinen shyǵartyp tastaýlaryńyz qajet», - dedi Oljas Otar.
Ol, sondai-aq, senim hat arqyly satylǵan kólik Ishki ister organdarynyń memlekettik tirkeýi boiynsha kimniń atynda tursa, salyqty sol adam tóleitinin eskertti.
