جٷرۋگە جارامسىز بولىپ قالعان كٶلٸككە سالىق تٶلەمەۋ ٷشٸن ۋەكٸلەتتٸ ورگانداردىڭ مەملەكەتتٸك تٸركەۋٸنەن شىعارۋ قاجەت, دەپ حابارلايدى قازاقپارات.
بۇل تۋرالى مەمملەكەتتٸك كٸرٸستەر كوميتەتٸنٸڭ ٶندٸرٸستٸك ەمەس تٶلەمدەردٸ ەكٸمشٸلەندٸرۋ باسقارماسى باسشىسىنىڭ ورىنباسارى ولجاس وتار ورتالىق كوممۋنيكاتسييالار ورتالىعىندا ٶتكەن بريفينگٸدە ايتتى.
«بٸز بٸر جاعدايدى تٷسٸنٸپ الۋىمىز كەرەك. كٶپتەگەن قازاقستاندىقتاردى مازالاپ جٷرگەن مەسەلەنٸڭ بٸرٸ وسى. كٶلٸك جارامسىز بولىپ قالعان جاعدايدا دا ول ٸشكٸ ٸستەر ورگاندارىنىڭ مەملەكەتتٸك تٸركەۋٸنەن شىعارىلماسا, سالىق ەسەپتەلەدٸ. تٸركەۋدەن شىعارىلعانعا دەيٸن جٷرسە دە, جٷرمەسە دە سالىق ەسەپتەلەدٸ», - دەدٸ كوميتەت ٶكٸلٸ.
ماماننىڭ ايتۋىنشا, ٸستەن شىققانىمەن تٸركەۋدەن شىعارىلماعان كٶلٸكتٸڭ سالىعىنا قاتىستى شاعىمدار ۆەدومستۆوعا جيٸ تٷسەدٸ ەكەن.
«كٶپتەگەن ازاماتتاردان ارىز, شاعىمدار تٷسٸپ جاتادى. «بەلەن جىل بۇرىن جارامسىز بولىپ قالعان, ٷيدٸڭ اۋلاسىندا قاڭىراپ بوس تۇرعان كٶلٸك ٷشٸن نەگە سالىق تٶلەۋٸم كەرەك» دەپ جاتادى. سالىق زاڭناماسىندا بۇل مەسەلە انىق جازىلعان. مەملەكەتتٸك تٸركەۋدەن شىعارىلعانعا دەيٸن سٸز سالىق تٶلەۋگە مٸندەتتٸسٸز. وسى ەفيردٸ پايدالانىپ سالىق تٶلەۋشٸلەرگە ايتقىم كەلەدٸ. ەگەر اتتارىڭىزدا جارامسىز بولىپ قالعان كٶلٸكتەر بولسا, ەرتەرەك ۋەكٸلەتتٸ ورگانداردىڭ ەسەبٸنەن شىعارتىپ تاستاۋلارىڭىز قاجەت», - دەدٸ ولجاس وتار.
ول, سونداي-اق, سەنٸم حات ارقىلى ساتىلعان كٶلٸك ٸشكٸ ٸستەر ورگاندارىنىڭ مەملەكەتتٸك تٸركەۋٸ بويىنشا كٸمنٸڭ اتىندا تۇرسا, سالىقتى سول ادام تٶلەيتٸنٸن ەسكەرتتٸ.
