© Sputnik / Bolat Shaihinov
Premer-Ministr Álihan Smaiylovtyń tóraǵalyǵymen ótken Memleket basshysynyń Sailaýaldy baǵdarlamasyn iske asyrý jónindegi respýblikalyq shtabtyń otyrysynda avtomobil joldaryn salý jáne rekonstrýktsiialaý máseleleri qaraldy, dep habarlaidy "Ult aqparat" primeminister.kz saityna silteme jasap.
Otyrysty asha otyryp, Úkimet basshysy 2030 jylǵa deiin 8 myń shaqyrym respýblikalyq jáne 14 myń shaqyrym jergilikti avtojoldardy sapaly salý men rekonstrýktsiialaý mindeti qoiylǵanyn atap ótti.
Júrgizilip jatqan jumystar men josparlar týraly indýstriia jáne infraqurylymdyq damý ministri Marat Qarabaev baiandady.
Onyń aitýynsha, biyl 11 myń shaqyrym avtomobil joly, onyń ishinde 7 myń shaqyrym respýblikalyq jeli jóndeý jumystarymen qamtylady. Búgingi tańda 70 myń shaqyrym jergilikti jeliniń 85%-y – normativtik jaǵdaida. Jambyl (97%), Mańǵystaý (96%) jáne Pavlodar (91%) oblystarynda jergilikti joldardyń jai-kúii jaqsy, 3 óńirde kórsetkishter ortashadan tómen: Batys Qazaqstan (46%), Aqtóbe (72%) jáne Atyraý (72%) oblystarynda.
Budan basqa, ministrlik 2024-2030 jyldary halyqaralyq qarjy institýttarynyń qarajatyn tarta otyryp, jalpy uzyndyǵy 4,4 myń shaqyrym bolatyn jańa jol jobalaryn iske asyrýdy pysyqtap jatyr. Atap aitqanda, «Jezkazǵan – Qaragandy» – 513 km, «Astana – Kostanai – RF shekarasy» – 830 km, «Beineý – Shalqar» – 515 km, «Atyraý – Dossor» – 86 km, «Qyzylorda – Aqtóbe» – 1 101 km, «Aktobe – Oral» – 628 km.
Otyrysta «QazAvtoJol» kompaniiasynyń basqarma tóraǵasy Meiirhat Qasymbaev pen birqatar óńir ákimderi sóz sóiledi.
Premer-Ministr joldardyń jai-kúii men kólik infraqurylymy ishki jáne syrtqy saýdany damytýdyń mańyzdy faktorlary ekenin atap ótti.
Alaida, Úkimet basshysynyń aitýynsha, sońǵy ýaqytta avtomobil joldarynyń sapasyna qatysty shaǵymdar kóp. Joldyń nasharlyǵy jol apatyna sebepshi bolyp, adamdardyń ólimine ákeledi, tranzittik tasymal kólemin azaitady, sonymen qatar eldiń imidjine teris áser etedi.
«Júrgizilip jatqan jóndeý jumystaryna jurtshylyq qanaǵattanbai otyr. Internette jumystyń reglament boiynsha emes, jańbyr, tipti qar jaýyp jatqan kezde júrgizilip jatqany túsirilgen kóptegen beinerolik pen fotosýretter tolyp júr», — dedi Álihan Smaiylov.
Mysal retinde Úkimet basshysy Abai oblysy Kókterek aýylynda qardyń ústine asfalt tóselgenin, al Pavlodar oblysynda asfaltty jolǵa shashyp tastaǵanyn aitty. Keibir óńirlerde aýyl turǵyndary jergilikti atqarýshy organdardan qaiyr kútpei, joldardy óz betinshe jóndeitin jaǵdailar kezdesedi. Almaty oblysy Rysqulov aýylynda, Mańǵystaý oblysy Atameken aýylynda osyndai jaǵdailar oryn aldy. Sonymen qatar bir ýchaskede jyl saiyn jóndeý jumystary júrgizilgen faktiler bar.
Álihan Smaiylov jol salý ádisterin túbegeili ózgertýdi talap etti.
Óńirlerdiń ákimdikterine jergilikti avtojoldar jelisin salý jáne jóndeý boiynsha sapaly jumys júrgizý tapsyryldy. Qurylys maýsymyn birden bastaý úshin memlekettik satyp alý men qurylys materialdaryn satyp alýdyń barlyq rásimderin jaqyn arada tezdetip aiaqtaý kerek.
Sonymen qatar Premer-Ministr osy jyldyń sońyna deiin «Merke-Býrylbaital», «Aqtóbe-Atyraý-Astrahan», «Almaty-Óskemen», «Ónege-Beisen», «Kaztalovka-Jánibek», «Úsharal-Dostyq» siiaqty mańyzdy avtojol jobalarynyń aiaqtalýyn qamtamasyz etýdi tapsyrdy.
