Qazaqstannyń Eńbek sińirgen qairatkeri Júrsin Erman qazir halyqty bir-birine sep bolýǵa, qamqorlyq jasap, tártip saqtaýǵa shaqyrdy, dep habarlaidy "Ult aqparat".
«Almatynyń irgesinde Jańalyq deitin aýyl bar. 1937-1938 jyldardaǵy saiasi qýǵyn-súrgin qurbandarynyń talaiy sol jerde jerlengen. Sáken Seifýllin, Iliias Jansúgirov, Beiimbet Mailinder... Kóp qoi qurban bolǵandar. Ár jyldyń mamyr aiynyń sońǵy kúni sol jerge baryp, quran oqyp, ardaqty Alashtyń arystaryn eske alyp, aza tutýshy edik. Endi qazir el bolyp, memleket, halyq bolyp Aza tutý kúniniń ústinde otyrmyz. Bir adamǵa kóńil aitýǵa boi úirengen ǵoi. Búkil halyqqa kóńil aitý asa qorqynyshty eken», - deidi Júrsin Erman.
Qazaqstannyń Eńbek sińirgen qairatkeri qazaqtyń nebir aiaýly da asyl azamattary ketip jatqanyn ókinishke eske aldy.
«Ár adamnyń, ár qazaqtyń ómiri qymbat. Memleketimiz bar dep kóńildi keńge salýshy edik. Alaida kei qiyndyqqa daiyn emes eken. Ásirese meditsina salasynan muny kórip otyrmyz. Biraq tilekti jaqsylyqqa tileý kerek. Búgin barlyq jerde Tý túsirilip, Quran qatym oqylyp, qurbandyq shalynyp, aza tutyp, bir-birimizge kóńil aityp jatyrmyz. Kún jamany keter deýshi edi ǵoi qazaq. Bul indettiń qashan ketetinin qaidan bileiik. Maýsymda jaǵdai turaqtalǵandai bolyp edi – qazir múlde órship ketti. Áleýmettik jelini ashýǵa, telefon shyryldasa da qandai habar kelip tur eken dep qorqyp otyratyn boldyq. Dese de úreige boi aldyrmaý kerek», - deidi ol.
Júrsin Erman bir-birimizge sep bolyp, qamqorlyq jasap, qatań sharalardyń bárine moiynsynyp, tártip saqtaýymyz kerektigin jetkizdi.
«Qaitys bolǵan azamattardyń týǵan-týystaryna, jaqyndaryna qaiǵyryp kóńil aitamyz. Sabyr bersin. Bul náýbetten de Alla jar bolsa shyǵatyn shyǵarmyz. Soǵan úmitteneiik, soǵan duǵa jasaiyq. Barshamyzdy jaqsy kúnderde kórisýge jazsyn, Alla Taǵala», - dedi Júrsin Erman.
Aita ketsek, elimizde qalyptasqan ahýalǵa bailanysty halyqqa úndeý jasaǵan QR Prezidenti Qasym-Jomart Toqaev 13 shildeni – Ulttyq aza tutý kúni dep jariialaityny týraly málim etken bolatyn. Tiisti ókimge Memleket basshysy kelesi kúni qol qoidy.
Qazaqstanda koronavirýs pandemiiasynyń qurbany bolǵan azamattardy eske alýǵa bailanysty búgin - Jalpyulttyq aza tutý kúni.
