Foto: Almaty PD
Jýrnalisterdiń kásibi qyzmetine kedergi keltirdi degen kúdikpen Arkadii Klebanov (Manevich) túrmege emes, psihiatriialyq klinikaǵa emdelýge jiberildi, - dep habarlaidy Kazinform agenttigi.
Sot jýrnalisterdiń zańdy kásibi qyzmetine kedergi keltirdi, jeke ómirge jáne derbes derekterge qol suǵylmaýshylyqty buzdy, kámeletke tolmaǵandardy qylmystyq quqyq buzýshylyq jasaýǵa tartty, bótenniń múlkine qasaqana zaqym keltirdi degen aiyp taǵylǵan Klebanovqa qatysty meditsinalyq sipattaǵy eriksiz emdeý sharalaryn qoldaný týraly isti qarady.
Sotta atap ótkendei, jábirlenýshiler politsiia organdaryna jýrnalisterdiń qyzmetine bailanysty qaýip-qater tóndirý, buzaqylyq áreketter jasaý, múlikti zaqymdaý jáne joiý faktileri boiynsha belgisiz tulǵalarǵa qatysty ótinishpen júgingen.
Osy fakti boiynsha qylmystyq is qozǵalyp, tergeý barysynda 6 tulǵanyń osyǵan qatysty ekeni anyqtaldy.Tergeý barysynda kúdiktilerdiń birine eki sot-psihiatriialyq saraptamasy júrgizildi. Qorytyndylarǵa sáikes Klebanov sozylmaly psihikalyq buzylysqa shaldyqqany anyqtaldy.
Sotqa deiingi tergep-tekserý qorytyndysy boiynsha oǵan qatysty materialdar máseleni qarastyrý jáne meditsinalyq sipattaǵy eriksiz emdeý sharalaryn qoldaný úshin sotqa jiberildi.
«Sot saraptamalardyń qorytyndylary negizinde Klebanov qoǵamdyq qaýipti áreketterdi jasaǵan kezde qabiletsiz kúide bolǵan degen qorytyndyǵa keldi: ol óziniń is-áreketteriniń naqty sipaty men qoǵamdyq qaýiptiligin túsinbegen jáne sozylmaly psihikalyq aýrýdyń saldarynan ózin-ózi basqara almaǵan. Sottalýshy qabiletsiz dep tanylyp, psihiatriialyq statsionarǵa eriksiz emdeýge jiberildi»,- dep habarlady sottan.
Jábirlenýshilerdiń azamattyq talaptary ishinara qanaǵattandyryldy. Materialdyq zalal jáne moraldyq ziiandy óteý esebine sottalýshynyń zańdy ókilinen 14 mln teńge óndirip alyndy.
Sot qaýlysy zańdy kúshine engen joq.
Eske salaiyq osy jyldyń naýryz aiynda jýrnalisterge jasalǵan shabýyldardyń tapsyrys berýshisi ustalǵan bolatyn.
Keiin jábirlenýshilerdiń ótinishi boiynsha Klebanovqa qatysty sot otyrysy jabyq rejimde ótetini belgili boldy.
