Foto: QazAqparat
Elimizde jýrnalisterdiń mártebesin belgileitin zań jobasy daiyndalyp jatyr. Bul týraly Aqparat jáne qoǵamdyq damý ministri Darhan Qydyráli Túrkistan oblysyndaǵy BAQ basshylarymen kezdesýinde málimdedi, dep habarlaidy QazAqparat.
Basqosýda Darhan Qýandyquly kópshilikti búgingi kúni ministrlik tarapynan atqarylyp jatqan jumystarmen tanystyryp ótti. Sondai-aq, jýrnalisterdi daiyndaý men biliktiligin arttyrý jáne statýsyn kóterý turǵysynan júzege asatyn jobalar týraly aitty.
«Májiliske usynylýy josparlanyp otyrǵan mass-media týraly zańnyń basym baǵyty bul jýrnalisterdiń statýsyn kóterýge baǵyttalǵan. Birinshiden, jýrnalisterge áleýmettik jaǵdai jasaý kózdelip otyr. Biraq, bul jýrnalistiń sóz bostandyǵyn shektemeidi. Jeńildetilgen nesie alýyna, baspanamen qamtylýyna múmkindik beredi», - dedi ol.
Sondai-aq, ministr zań jobasyna sáikes BAQ ókilderiniń aqparatqa qoljetimdiligi artatynyn aityp ótti.
«Jýrnaliske beriletin jaýaptyń merzimin qysqartýdy usynyp jatyrmyz. Jýrnalisttik zertteýge qatysty bolatyn kez kelgen aqparatqa jýrnalist jeńil qol jetkizýi kerek»-dedi ministr.
Kezdesýde Darhan Qýandyquly bas redaktorlardyń usynystaryn tyńdap, aýdandyq, qalalyq basylymdardyń jai-kúiine qatysty týyndaǵan suraqtarǵa keń kólemde jaýap berdi.
