Grýziiada Janbota Tólegenniń ólimine qatysty ótken sot otyrysynda sot 50 jastaǵy Gabriel Hohobashvilidi 11 jylǵa sottady. Alaida, aryzdanýshy tarap bul jazany tym jeńil dep sanap, sheshimdi qaita qaraý úshin shaǵym túsirmek. Bul týraly "Ult aqparat" Informburo.kz agenttigine silteme jasap habarlaidy.
Grýziialyq advokat Nino Andriashvilidiń aitýynsha, sot Gabriel Hohobashvilidiń "jeke basynyń paidasy úshin qasaqana adam óltirgenine" jetkilikti dálelder joq ekenin alǵa tartqan. Soǵan orai, endi qajetti dálelder jinaý jumysy bastalady.
Gabriel Hohobashvili tergeý barysynda-aq óziniń aiybyn moiyndaǵan bolatyn. Ol sotta da ony rastady. Alaida, sot jazany buryn tańylǵan "Jeke basynyń paidasy úshin qasaqana kisi óltirý" baby boiynsha emes, tek "kisi óltirý" baby boiynsha ǵana taǵaiyndaǵan. Buǵan deiin Nino Andriashvili túsindirgendei, Grýziiada "Jeke basynyń paidasy úshin qasaqana kisi óltirý" baby boiynsha 16-20 jylǵa ne tipti ómir boiyna bas bostandyǵynan aiyrý jazasy qarastyrylǵan.
Eske salaiyq, qazaqstandyq jýrnalist Janbota Tólegen 2023 jylǵy 21 mamyrda Grýziianyń shyǵysyndaǵy Kahetiiada, Sagaredjo aýylynyń mańynda kisi qolynan ajal qushqan bolatyn. Keiin aiypty retinde Gabriel Hohobashvili esimdi grýziialyq azamat ustaldy. Ol Janbota Tólegendi aldap, Tbilisiden Kahetiiaǵa barýǵa úgittep, keiin basynan kirpishpen uryp óltirgenin, al onyń denesin ózenge laqtyryp jibergenin moiyndady.
