گرۋزييادا جانبوتا تٶلەگەننٸڭ ٶلٸمٸنە قاتىستى ٶتكەن سوت وتىرىسىندا سوت 50 جاستاعى گابريەل حوحوباشۆيليدٸ 11 جىلعا سوتتادى. الايدا, ارىزدانۋشى تاراپ بۇل جازانى تىم جەڭٸل دەپ ساناپ, شەشٸمدٸ قايتا قاراۋ ٷشٸن شاعىم تٷسٸرمەك. بۇل تۋرالى "ۇلت اقپارات" Informburo.kz اگەنتتٸگٸنە سٸلتەمە جاساپ حابارلايدى.
گرۋزييالىق ادۆوكات نينو اندرياشۆيليدٸڭ ايتۋىنشا, سوت گابريەل حوحوباشۆيليدٸڭ "جەكە باسىنىڭ پايداسى ٷشٸن قاساقانا ادام ٶلتٸرگەنٸنە" جەتكٸلٸكتٸ دەلەلدەر جوق ەكەنٸن العا تارتقان. سوعان وراي, ەندٸ قاجەتتٸ دەلەلدەر جيناۋ جۇمىسى باستالادى.
گابريەل حوحوباشۆيلي تەرگەۋ بارىسىندا-اق ٶزٸنٸڭ ايىبىن مويىنداعان بولاتىن. ول سوتتا دا ونى راستادى. الايدا, سوت جازانى بۇرىن تاڭىلعان "جەكە باسىنىڭ پايداسى ٷشٸن قاساقانا كٸسٸ ٶلتٸرۋ" بابى بويىنشا ەمەس, تەك "كٸسٸ ٶلتٸرۋ" بابى بويىنشا عانا تاعايىنداعان. بۇعان دەيٸن نينو اندرياشۆيلي تٷسٸندٸرگەندەي, گرۋزييادا "جەكە باسىنىڭ پايداسى ٷشٸن قاساقانا كٸسٸ ٶلتٸرۋ" بابى بويىنشا 16-20 جىلعا نە تٸپتٸ ٶمٸر بويىنا باس بوستاندىعىنان ايىرۋ جازاسى قاراستىرىلعان.
ەسكە سالايىق, قازاقستاندىق جۋرناليست جانبوتا تٶلەگەن 2023 جىلعى 21 مامىردا گرۋزييانىڭ شىعىسىنداعى كاحەتييادا, ساگارەدجو اۋىلىنىڭ ماڭىندا كٸسٸ قولىنان اجال قۇشقان بولاتىن. كەيٸن ايىپتى رەتٸندە گابريەل حوحوباشۆيلي ەسٸمدٸ گرۋزييالىق ازامات ۇستالدى. ول جانبوتا تٶلەگەندٸ الداپ, تبيليسيدەن كاحەتيياعا بارۋعا ٷگٸتتەپ, كەيٸن باسىنان كٸرپٸشپەن ۇرىپ ٶلتٸرگەنٸن, ال ونىڭ دەنەسٸن ٶزەنگە لاقتىرىپ جٸبەرگەنٸن مويىندادى.
