Foto: Ulysmedia.kz
Ulysmedia.kz portalynyń bas redaktory Samal Ibraeva ózin tsifrlyq býllingke tap bolǵanyn málimdep, jaǵdaidy baqylaýǵa alýyn surap Qazaqstan Prezidenti Qasym-Jomart Toqaevtan kómek surady. Bul týraly Ulysmedia.kz protalyna silteme jasap Ult.kz habarlaidy.
Samal Ibraevanyń jazbasynyń tolyq nusqasy:
«Maqalany óshir, taqyrypty aýystyr, sýretti alyp tasta – áitpese kórsetemiz...»
Mundai eskertýdi birneshe ret estidim. Aqyry kórsetetinin kórsetip tyndy. Kyzdar.net saity arqyly sumdyq shabýyl jasaldy – meniń sýretim, aty-jónim men telefon nómirim intim qyzmet kórsetiletin saittaǵy jalǵan anketaǵa jariialandy.
Birneshe kúnnen beri telefonyma tynym joq – uiatsyz usynystar men mazasyz qońyraýlar úzdiksiz keledi. Tipti, tanystarym men oqyrmandar habarlasyp, ne bolǵanyn suraidy. Men bárine túsindirýmen álekpin. Al bul qylmystyń artynda turǵandar, sirá, ózderin jeńimpaz sezinetin syńaily – tsifrlyq shabýyl arqyly piǵyldylar degenine jetti.
Endi suraq týyndaidy: kim jáne ne úshin mundai aram isti uiymdastyrdy? Ulysmedia.kz jumysyn toqtatý úshin kim aqsha tóledi? Biz kimniń jolyn kestik?
Ulysmedia.kz – tek halyq pen memlekettiń múddesi úshin ótkir máselelerdi kóteretin táýelsiz media. Bizdi milliondaǵan adam oqidy ári qoldaidy. Sol sebepti bul shabýyldy – sóz bostandyǵyna tóngen qaýip, ashyq qysym men qorqytý áreketi dep baǵalaimyz.
Politsiiaǵa júgingennen keiin bes kún ótkende ǵana quqyq qorǵaý organdary bul isti kiberqylmys pen tsifrlyq býlling dep tanyp, qylmystyq is qozǵady. Mundai jaǵdai basymyzdan eki jyl buryn da ótken. Ol kezde istiń qozǵalýyna Prezident Toqaevtyń aralasýy sebep boldy. Bul joly da Memleket basshysy qoldaý bildiredi dep úmit artamyn. Óitkeni mundai qysym men qorqytý áreketteri Prezident únemi aityp júrgen qaǵidalarǵa túbegeili qaishy.
Qurmetti Qasym-Jomart Kemeluly!
Men – jýrnalist, qoǵam belsendisi ári eń bastysy Qazaqstan Respýblikasynyń azamatymyn. Búgin Sizge májbúrli túrde júginip otyrmyn. Sebebi men qazirg elimizdegi kez kelgen áielge tónip turǵan tsifrlyq zorlyqtyń sumdyq túrimen betpe-bet keldim.
Osy qylmystyq isti jeke baqylaýyńyzǵa alýyńyzdy suraimyn.
Kyzdar.net saitynda jariialanǵan anketa – arandatýshylyq, jala jabý, ar-namysyma, qadir-qasietime, iskerlik bedelime jáne jeke ómirge qol suǵý. Bul – zańsyz áreket. Jalpy, atalǵan saittyń ózi de zańsyz jumys istep otyr.
Bul shabýyldy men óz kásibi qyzmetimmen – táýelsiz jýrnalistikadaǵy eńbegimmen tikelei bailanystyramyn. Bul – maǵan jáne bizdiń redaktsiiaǵa jasalǵan qysym men qorqytý áreketi.
P.S.
Politsiia bul shabýyldy kim uiymdastyrǵanyn anyqtai alar dep senemin. Eń bastysy – jalǵan anketany qurǵan adamdar anyqtalyp, zańsyz kontent óshirilip, ol sait tolyq buǵattalýy tiis.
Bizdiń oqyrmandar: «Bas ime, kúres!» dep qoldaý kórsetip jatyr. Sol úshin de Ulysmedia.kz redaktsiiasy burynǵydai óz jumysyn jalǵastyra beredi. Elimiz úshin mańyzdy ári ózekti aqparatty jetkizý – bizdiń basty mindetimiz bolyp qala bermek.
