Kollaj: Ulysmedia.kz
Almaty oblysy Qaskeleń qalasyndaǵy №12 birmandatty sailaý okrýgi jýrnalist, YouTube-tegi ND kanalynyń avtory Dýman Muhammedkárimdi zań talaptaryna sai emes dep, májilis sailaýyna úmitker retinde tirkemei qoidy, dep habaralidy Azattyq radiosy.
Komissiia jýrnalist el ishinde segiz ai esh jerde tirkeýde turmaǵan dep otyr.
"Almaty oblysy boiynsha politsiia departamentiniń kóshi-qon qyzmeti basqarmasynyń jaýabyna sáikes, kandidat Dýman Muhammedkárim Astana, Oral, Kókshetaý qalalarynda, Aqmola men Almaty oblystarynda tirkeýde bolǵan. 2021 jylǵy 21 jeltoqsannan bastap tirkeýden alyp tastalǵan. 2022 jylǵy tamyzdan qazirgi ýaqytqa deiin Almaty oblysynyń Ile aýdanynda tirkelgeni anyqtalǵan. Almaty oblysy boiynsha politsiia departamentiniń kóshi-qon qyzmeti basqarmasy kórsetilgen málimetter negizinde kandidat Muhammedkárimniń ótinishin Konstitýtsiianyń 51-babynyń 4-tarmaǵynda belgilengen talaptarǵa sai qanaǵattandyrmaǵan (El aýmaǵynda 10 jyl tirkeýde turý talaby – red. ). Iaǵni keiingi 10 jyl ishinde elimizdiń aýmaǵynda turaqty turý talabyna sáikes emes" dedi komissiia tóraiymy Ultýsyn Barhinova.
Komissiia otyrysyn jýrnalist Muhammedkárim óziniń ND arnasynda jariia etken.
Komissiia otyrysynda jýrnalist buǵan kelispeitinin aitqan, alaida otyrysqa qatysyp otyrǵan kóshi-qon qyzmetiniń ókili Muhammedkárim "segiz aidai baza boiynsha tirkeýde bolmaǵan" dep qysqa qaiyrdy. "Kelispeseńiz, árine, sotqa berýge quqyǵyńyz bar" - dedi komissiia tóraiymy Barhinova.
Jýrnalist komissiia sheshimine qarsy jáne bul sheshimniń "saiasi astary bar" deidi.
"Keiingi 10 jyl ishinde elimizdiń aýmaǵynda turaqty turý" talabyna sáikes emes deýi zańsyz. Men - jýrnalispin, birneshe qalada turǵanym ras. Degenmen men el ishinde turdym ǵoi. Negizgi tirkeýim Almaty oblysy Ile aýdanynda, turaqty túrde. Al jumys babymen ózge qalalarda turǵanda sol jaqta ýaqytsha tirkeýge turyp keldim. Buǵan deiin Astana qalasynda páter jaldap turǵanymda, páter iesi men ýaqytsha emes turaqty tirkeýge qoiǵan eken. Sóitip, men páterden shyǵyp ketkennen keiin, meni tirkeýden de shyǵaryp jibergen. Men ony keiin kólik alǵanda, arada segiz ai ótkende bir-aq bildim. Kóshi-qon qyzmeti aityp otyrǵan "segiz ai bazada bolmaýymnyń" sebebi – osy" deidi Dýman Muhammedkárim.
Jýrnalist komissiia sheshiminiń ústinen sotqa shaǵymdanbaq. Biraq "ol shaǵymymdy sot qarap bitkenshe, qaita qujat tapsyryp úlgermeýim ábden múmkin" dep otyr.
Eske salaiyq, 19 qańtarda Qazaqstan Prezidenti Qasym-Jomart Toqaev Parlament Májilisi men jergilikti máslihattardy taratyp, 19 naýryzda sailaý ótetinin jariialaǵan. Sailaýǵa partiia atynan ia jeke kandidat retinde qatysýǵa bolady.
Birneshe jyl memlekettik telearnada jumys istegen Dýman Muhammedkárim keiingi jyldary YouTube jelisindegi ND arnasynyń avtory retinde qoǵamdyq saiasi máselelerge bailanysty habarlarymen tanylǵan.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
