Qaraǵandy oblysynda kámeletke tolmaǵan úsh balanyń jolda ketip bara jatqan GAZel avtokóligine jarmasyp, jol boiymen qozǵalǵan sáti túsirilgen beinejazba áleýmettik jelilerde tarady.
Oqiǵa jol qozǵalysy erejelerin óreskel buzýmen qatar balalardyń ómirine eleýli qaýip tóndirgen. Jedel túrde júrgizilgen tekserý nátijesinde oqýshylardyń jeke tulǵalary anyqtaldy. Olar 10-11 jas aralyǵyndaǵy mektep oqýshylary bolyp shyqty. Barlyq bala zańdy ókilderimen birge politsiia bólimine jetkizildi.
"Balalardyń ata-analaryna qatysty bala tárbiesine nemquraily qaraǵany úshin ákimshilik jaýapkershilikke tartyldy. Atalǵan is boiynsha materialdar kámeletke tolmaǵandardyń isteri jáne olardyń quqyqtaryn qorǵaý jónindegi komissiiaǵa joldandy. Sonymen qatar jasóspirimder mektepishilik esepke alynatyn bolady", - delingen habarlamada.
Politsiia qyzmetkerleri ata-analarǵa balalarynyń júris-turysyn baqylaýda ustaýdyń jáne olardy joldaǵy qaýip-qaterden saqtandyrýdyń mańyzdylyǵyn eske saldy.
