Tanymal reper Navai-ǵa qatysty eki aiǵa qamaýǵa alý túrindegi bultartpaý sharasy tańdaldy. Ol esirtki zattaryn shekara arqyly zańsyz alyp ótti degen kúdikke ilingen, dep habarlaidy ult.kz.
Aqparatqa sáikes, bir kún buryn Qazaqstan shekarasynda Mercedes markaly avtokólik tekserilip, ishinen tyiym salynǵan zattar tabylǵan. Sol sátte kólik tizgininde reperdiń ózi bolǵan.
Habarlanǵandai, jaýap alý barysynda óner iesi esirtkini Qyrǵyzstan astanasy Bishkekten satyp alǵanyn aitqan. Osy jaǵdaiǵa bailanysty oǵan qatysty kontrabanda baby boiynsha qylmystyq is qozǵalǵan. Oqiǵadan keiin Qyrǵyzstannyń quzyrly organdary da tekserý bastaǵan. Atap aitqanda, reperdiń tyiym salynǵan zattarmen memlekettik shekaradan qalai ótkeni anyqtalyp jatyr.
“Tekserý nátijesinde zańbuzýshylyqtar anyqtalǵan jaǵdaida, kináli laýazymdy tulǵalarǵa qoldanystaǵy zańnamaǵa sáikes tiisti sharalar qabyldanady”, – dep málimdedi Qyrǵyzstannyń Shekara qyzmeti.
Qazirgi ýaqytta oqiǵanyń mán-jaiy anyqtalyp jatyr. Reperge qatysty túpkilikti sot úkimi shyqqany týraly aqparat joq.
Aita keteiik, buǵan deiin Malim.kz reper Navai-ge taǵy bir bap boiynsha aiyp taǵylýy múmkin ekenin habarlaǵan edi.
NAVAI kim?
Navai – ázerbaijan tekti reseilik reper, ánshi ári ánderdiń avtory. Onyń shyn esimi – Navai Bakirov. Óner iesi 1995 jyly 2 sáýirde Reseidiń Samara qalasynda dúniege kelgen. Qazir ol 31 jasta. Balalyq shaǵy Resei men Ázerbaijanda ótken. Ata-anasy kóshpeli haiýanattar baǵynda jumys istegendikten, otbasy jii qonys aýdarǵan. Navai mektep kezinen mýzykaǵa qyzyǵyp, horda án aitqan jáne túrli óner baiqaýlaryna qatysqan. 2011 jyly “Ne vral” atty alǵashqy ánin kópshilikke usynǵan.
2016 jyly ol Aleksandr Alievpen (HammAli) birigip, “HammAli & Navai” dýetin qurdy. Ekeýiniń alǵashqy birlesken týyndysy “Den v kalendare” dep atalady. 2018 jyly jaryq kórgen “Janavi” albomy olardyń tanymal bolýyna jol ashty. Dýet “Pýstite menia na tantspol”, “Devochka-voina”, “Ptichka” jáne basqa da ánderimen tyńdarman yqylasyna bólendi. Navai 2020 jyldan bastap jeke shyǵarmashylyǵyn da damyta bastady. 2025 jyly “HammAli & Navai” dýeti shyǵarmashylyq joldaryn bólek jalǵastyratynyn jariialady.
