Qazaqstanda jumys berýshiler jumys toqtap qalǵan jaǵdaida qyzmetkerlerine eń tómengi jalaqy mólsheri, iaǵni 42 500 teńgeden tóleýi tiis. Bul, Eńbek kodeksiniń jańa babynda jazylǵan, dep habarlaidy "Ult aqparat".
«Eger azamattardan Áleýmettik ál-aýqat basqarmasyna kásiporyn toqtap turǵan ýaqyt (karantin kezinde) úshin eń tómengi jalaqy tólenbegeni týraly shaǵym túsetin bolsa, biz bul faktini tekserip, anyqtaimyz. Bul úshin ákimshilik jaza qarastyrylǵan. Iaǵni, aiyppul salynady. Jalaqyny tólemegen jáne keshiktirgen shaǵyn biznes iesi - 60 AEK, orta biznes - 100 AEK jáne iri biznes iesi 150 AEK kóleminde aiyppul tóleidi», - dedi Almaty qalasynyń bas eńbek inspektory Ainur Muqajanova.
Onyń atap ótýinshe, jumys berýshi 112-bapqa sáikes, jumystyń májbúrli toqtaýyn rásimdeýge mindetti.
«Osyndai jaǵdaiǵa tap bolǵandar Qonaev kóshesi, 122 mekenjaiynda ornalasqan basqarmaǵa júgine alady», - dep qosty ol.
Al qalalyq Kásipkerler palatasynyń direktory Nariman Ábilshaiyqovtyń aitýynsha, jumystyń toqtap qalýy karantinge bailanysty. Sol sebepti jumysshylardyń barlyǵy birdei eń tómengi jalaqyny tólei almaidy.
«Bul jerde mynany túsiný kerek. Jumystyń toqtaýyna jumys berýshi kináli emes. Bul – karantin rejiminen orai týyndaǵan másele. Osyǵan bailanysty kásipkerlerden kóptegen usynystar, shaǵymdar túsip jatyr. Bastamashyl top Ulttyq ekonomika jáne Eńbek ministrlikterine osy kezeńge jalaqy tóleýde jeńildikter men ózgertýler engizý týraly usynys jasady. Eger jyl sońyna deiin jaǵdai turaqtansa jáne kásipker barlyq qyzmetkerlerin qaita jumyspen qamtamasyz etse, onda olarǵa jeńildikter men sýbsidiialar berýin suraidy. Qazir mundai mehanizmdi Eńbek ministrligimen jáne Ulttyq palatamen birlesip qarastyrýda», - dep túsindirdi ol.
