© Sputnik / Stringer
Kenshiler men Bestóbe aýylynyń turǵyndary Kókshetaýdaǵy Mádeniet úiiniń ǵimaratynda túnedi.
Narazylyq bildirýshiler qazir de Mádeniet úiinde otyr. Olar Indýstriia jáne infraqurylymdyq damý vitse-ministri eldi mekenge attanǵany týraly habarlama aldy. Kenshiler qysqartý týraly habarlamany qaitaryp alyp, burynǵy investordyń ken ornynan ketýin talap etip jatyr, dep habarlaidy Sputnik Qazaqstan agenttigi.
Bestóbeliktermen birge Aqmola oblysy ákiminiń orynbasary Eldos Ramazanov pen politseiler de "Raýan" mádeniet úiiniń ǵimaratynda túnedi.
Narazylyq bildirýshiler neni talap etip otyr?
Olar investordyń ketýin talap etip jatyr jáne jańadan kelgen investor qazirgi ýaqytta sý basqan kenishterdi, "eski" baiytý fabrikasyn iske qosyp, ken óndirýdi jerasty ádisimen jalǵastyrady dep úmittenedi. Sondai-aq adamdar jumys berýshiden jumystan qysqartý týraly litsenziialaryn qaitaryp alýdy talap etti. Bestóbelikter jańa investorǵa qatysty másele sheshilmeiinshe jumystan bosatý týraly sheshimmen kelispeidi.
© Sputnik / Stringer
Buǵan deiin kezdesý barysynda halyq bilikke, altyn óndirýshi kompaniia ókilderine, sondai-aq áleýetti investorǵa ózderin mazalaǵan suraqtardy qoidy. "Sei-Nar" kompaniialar toby Bestóbe jobasyn qabyldaýǵa qyzyǵýshylyq tanytty. Onyń quramyna kiretin "Altyn qazyna" JShS basshysy Erlan Qabyldenov sheshim qabyldaý úshin negizinen kenishte qandai qor bar ekenin jáne jabdyq qandai kólemde jáne qandai sapada beriletinin anyqtaý kerek ekenin aitty. Al muny anyqtaý úshin aýdit júrgizý qajet.
Jumysshylar tekserý kezinde jumys oryndaryn saqtap qalýǵa bola ma degen suraq qoidy. Alaida holding ókili bul múmkin emes ekenin aitty. Ol jobanyń keleshegi, litsenziia alý merzimi, qoldanystaǵy múlik týraly aqparatty bilmei jáne kásiporynnyń burynǵy iesimen qandai da bir kelisimder jasamai 1200 adamdy jumysqa qabyldaý úlken jaýapkershilik ekenin túsindirdi.
"Ýaqytty esepke alý kerek. Eger ministrlik, úkimet bizge nysandy aýdarýdy jedel oryndaýǵa kómektesse, sodan keiin bizge qandai jabdyq beretinin anyqtaýymyz kerek. Qazir qajetti jabdyqty Ýkrainadan, Reseiden satyp alý kúrdeli. Jabdyq jarty jyl turalap, máselelerdi sheshý bir jylǵa sozylýy múmkin. Onda nege biz bul jobaǵa kirisýimiz kerek?" – dedi Qabyldenov.
© Sputnik / Stringer
Ol eger indýstriia jáne infraqurylymdyq damý ministrligi aktsionerlik qoǵamǵa aýdit júrgizý úshin qujattardy tezirek berýge kómektesse, kásiporyn úsh ai ishinde kenishtegi jaǵdaidy zerdeleýge daiyn ekenin jáne másele oń sheshilse, shahtalardan sý aidaýdy bastaýǵa kirisetinin aitty.
"Qazaqaltyn" JShS bas direktory Rústem Qarakesov kompaniia qysqartý týraly habarlamany keri qaitarmaitynyn aitty. Biraq ol Bestóbe alańyn jańa investorǵa qaita rásimdeýdi jedeldetýge kómektesýge ýáde berdi.
Ákimdik te qarap otyrmaýǵa ýáde etti
"Men Ermek Boranbaiulyna (Marjyqpaev, oblys basshysy – Sputnik) jaǵdai týraly baiandaimyn. Biz "Altynalmas" basshylyǵyna habarlasyp, aýdit kezinde kenshilerdi jumystan bosatpaýyn suraimyz", - dedi Eldos Ramazanov.
Bilik dúisenbige deiin kútýdi suraǵanymen, adamdar ǵimarattan shyǵýdan úzildi-kesildi bas tartty.
"Eki jyl kúttik, osy máselelerdi sheshemiz dep ýáde berdi. Nátijesinde 1200 adam jumystan shyǵaryldy" – dedi bestóbelikter.
© Sputnik / Stringer
Olar premer-ministrdiń birinshi orynbasarynyń mindetin atqarýshy Roman Skliardan aýylǵa kelýdi suraǵan úndeýin oqyp berdi.
"Memleket basshysy sizge jeke tapsyrma berdi. Siz kelgenge deiin kenshiler men aýyl turǵyndary qazirgi jaǵdaidyń rettelýin talap etip Mádeniet úiiniń ǵimaratynda bolady", - dedi úndeý avtorlary.
