Eńbek resýrstaryn damytý ortalyǵynyń Strategiia jáne jobalyq basqarý departamentiniń direktory Aleksandra Molchanovskaia jumyssyz qazaqstandyqtyń negizgi sipattaryn atady, dep habarlaidy QazAqparat.
«Búginde bizde ótinish bildirgen azamattardy jumysqa ornalastyrýmen ainalysatyn 203 jumyspen qamtý ortalyǵy bar. Adamdy jumyssyzǵa jatqyzý úshin ol úsh shartqa sáikes kelýi kerek. Jumysy joq jáne ony belsendi túrde izdep júrgen, tabylǵan jumysqa aldaǵy eki apta ishinde kirisýge daiyn adam jumyssyz dep tanylady. Eger adam jumyssyz bolsa, biraq ol ony izdemese, onda jumyssyzǵa jatpaidy. Ol jai ǵana ekonomikalyq turǵyda belsendi emes adam bolyp sanalady», - deidi sarapshy.
Sondai-aq, ol qazaqstandyqtardyń jumyspen qamtý ortalyqtary men eńbek birjalaryna tirkelýge qulyqsyz ekenin aitady. Oǵan jumyssyzdarǵa beriletin járdemaqynyń tómen bolýy da áser etetin kórinedi.
«Bul jaǵdai jumyssyzdyq boiynsha áleýmettik tólemderdiń óte tómen deńgeiimen bailanysty. Onyń mólsheri 2020 jyly orta eseppen 43 myń teńge boldy. Biz 2019 jáne 2020 jyldary jumyssyz retinde tirkelgenderge taldaý jasadyq. Jumyssyz retinde járdemaqy alatyndar negizinen 30-44 jas aralyǵyndaǵy áielder», - deidi Aleksandra Molchanovskaia.
