Mindetti áleýmettik meditsinalyq saqtandyrýdy engizý jónindegi jobalyq keńse jetekshisi Záýresh Balkenova 2020 jyldyń 1 sáýirinen bastap jumys istemeitin jáne ózin-ózi jumyspen qamtyǵan azamattarǵa meditsinalyq kómektiń qandai túrleri kórsetiletinin aityp berdi, dep habarlaidy QazAqparat.
Onyń aitýynsha, eger adam ózin-ózi jumyspen qamtyǵan bolsa, onda ol MÁMS-tiń eki toptamasymen birdei meditsinalyq kómek alý úshin ai saiyn jarna aýdaryp otyrýy qajet. Al eger jumyssyz bolsa, Jumyspen qamtý ortalyǵyna tirkelýi kerek. Jumyspen qamtý ortalyǵynda tirkelmegen jaǵdaida, birinshi toptamamen tegin meditsinalyq kómektiń kepildendirilgen kólemin ǵana alady.
«Eger adam jumys istemese, onda ol jumyssyz retinde resmi túrde Eńbekpen qamtý ortalyqtaryna tirkelýi tiis. Oǵan jumys taýyp alý úshin ýaqyt beriledi nemese ol atalǵan jarnany derbes tóleýshi retinde salyp otyrýy qajet. Zeinetkerler, stýdentter, balalar, múgedekter, 3 jasqa deiin bala kútimimen otyrǵan áielder, jalpy azamattardyń barlyq 15 sanaty nemese 10 millionǵa jýyq qazaqstandyq memlekettiń qorǵaýynda bolady. Memleket olardyń jarnalaryn tolyq tólep, Áleýmettik meditsinalyq saqtandyrý qoryna aýdarady», - dedi agenttik tilshisine suhbat bergen Záýresh Balkenova.
Onyń aitýynsha, Meditsinalyq saqtandyrý qoryna turaqty jarnasyn aýdaryp otyrǵan adam mindetti áleýmettik meditsinalyq saqtandyrý aiasyndaǵy ózine qajetti qyzmettiń barlyq spektrin alady.
«Eger meditsinalyq qyzmettiń shynaiy qunymen salystyrar bolsaq, onda búginde Qazaqstanda tek dárigerdiń bastapqy qabyldaýynyń ózi 3,5 myń teńge turady. Al myna jerde aiyna sondai aqshaǵa barlyq qyzmetti alýǵa bolady. Tiimdigi aiqyn kórinedi», - dedi jobalyq keńse jetekshisi.
Záýresh Balkenovanyń dereginshe, jumys berýshiniń jumysshysyna aýdaratyn eń joǵary somasy aiyna 8 500 teńgeni quraidy. Bul rette, jumysshynyń ailyq kirisi 425 myń teńge jáne odan joǵary bolýy tiis. Al jumysshynyń jalaqysynan ózi úshin salatyn jarnasynyń kólemi aiyna 4 250 teńge bolady. Bul oraida da onyń jalaqysy aiyna 425 myń teńge ne odan joǵary bolýy qajet. Jeke kásipkerler úshin ailyq jarna 2 975 teńgeni, al derbes tóleýshiniń ailyq jarnasy 2 125 teńgeni quraidy.
«2020 jyly biryńǵai jiyntyq tólem túrindegi ai saiynǵy jarna qala turǵyndary úshin 1 ailyq eseptik kórsetkish bolady. Bul - 2 651 teńgege teń. Al aýyl turǵyndary úshin 0,5 AEK nemese 1 325,5 teńgeni quraidy», - dedi ol.
