Halyqty jumyspen qamtý ortalyqtarynda esepte turǵan jumyssyzdarǵa tótenshe jaǵdai kezinde qashyqtyqtan bilim men daǵdy alý múmkindigi jasaldy, dep habarlaidy "Ult aqparat".
«QR Eńbek jáne halyqty áleýmettik qorǵaý ministrligi tótenshe jaǵdai rejiminiń engizilgenine bailanysty Coursera jappai onlain bilim berý platformasymen kelisimge kelip, Halyqty jumyspen qamtý ortalyqtarynda esepte turǵan jumyssyzdar úshin qajetti daǵdylar men mamandyqtar boiynsha onlain-rejimde kýrstardan ótý múmkindigine qol jetkizdi. Aqyly negizde bir kýrs boiynsha oqytý shamamen 400 AQSh dollary turady. Alaida qol jetkizilgen kelisim aiasynda jumyssyz qazaqstandyqtarǵa bul múmkindik tegin beriledi», - delingen atalǵan ministrlik taratqan aqparatta.
Vedomstvo málimetinshe, joba aiasynda azamattar 298 kýrs boiynsha bilim ala alady. IT, gýmanitarlyq ǵylymdar, ekonomika, fizika, meditsina, kásipkerlik, marketing syndy baǵyttar boiynsha oqýǵa bolady. Kýrstardyń uzaqtyǵy 6-dan 10 aptaǵa deiin sozylady. Kýrstar tapsyrmalardan, aptalyq jattyǵýlardan jáne keide qorytyndy jobadan nemese emtihannan turady.
«Pandemiiaǵa bailanysty búkil álemde tsifrlyq tehnologiialar, onyń ishinde onlain-bilim de keńinen taralýda. Qazaqstandyqtar da olardy belsendi paidalanýda. Óitkeni tótenshe jaǵda i rejimi oflain ózara is-qimyldy shekteidi. Sonymen qatar, bul yńǵaily da. Sebebi kez-kelgen ýaqytta jáne úiden shyqpai-aq bilim alýǵa bolady. Biraq, biz úshin otandastarymyzdyń tótenshe jaǵdai aiaqtalǵannan keiin básekeli jalaqysy bar perspektivaly jumys tapqany mańyzdy. Bul jerde úmitkerdiń daǵdylary men bilimi mańyzdy ról atqarady. Sondyqtan kelissóz júrgizdik. Nátijesinde 2020 jyldyń sońyna deiin 50 myń jumyssyz qazaqstandyqty tegin oqytýǵa kelistik», – dedi QR Eńbek jáne halyqty áleýmettik qorǵaý vitse-ministri Nariman Muqyshev.
Jobaǵa qatysý úshin resmi túrde jumyssyz retinde tirkelý jetkilikti. Coursera.org saityna tirkelý kezinde enbek.kz-te kórsetilgen elektrondyq poshtanyń meken-jaiyn nemese jumyspen qamtý ortalyǵynda jumyssyz retinde tirkelýdi paidalaný óte mańyzdy.
