«Jumyspen qamtý jol kartasy» baǵdarlamasyna bólingen qomaqty qarjy qumǵa sińgendei joq bolmaýy tiis. Bul týraly Tótenshe jaǵdai rejimin qamtamasyz etý jónindegi memlekettik komissiianyń otyrysynda Memleket basshysy Qasym-Jomart Toqaev aitty, dep habarlaidy QazAqparat.
«Halyqty jumyspen qoldaý úshin «Jumyspen qamtý jol kartasy« baǵdarlamasy qabyldandy. Onyń aiasynda virýstan keiingi kezeńde shamamen 240 myń jumys orny qurylady. Ony júzege asyrýǵa teńdessiz soma (1 trln teńgege deiin) bólinedi. Buǵan deiin birneshe ret oryn alǵandai, bólingen qarjynyń qumǵa sińip ketpeýi barynsha mańyzdy. Sondyqtan Úkimet pen ákimder qazaqstandyq kadrlardy, otandyq qurylys kompaniialary men qurylys materialdaryn óndirýshilerdi tartýy mańyzdy», - dedi Memleket basshysy.
Osy rette QR Prezidenti josparlanǵan jumys oryndarynyń basym bóligi ýaqytsha ekendigine basa nazar aýdardy.
«Baǵdarlama aiaqtalǵannan keiin turaqty jumyspen tek qana 13 myń adam qamtamasyz etiletin bolady. Birqatar óńirde baǵdarlama qorytyndysy boiynsha turaqty jumys oryndarynyń saýsaqpen sanarlyqtai sanyn qurý josparlanǵan. Jumyspen qamtýdyń eki túri arasyndaǵy balansty qamtamasyz etý qajet. Daǵdarys kezinde ýaqytsha jumysqa ornalasý mańyzdy. Biraq, barynsha keń ári sapaly jumys oryndarynyń keleshegi jaiynda da oilaý qajet», - dedi Q.Toqaev.
