QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda Jumyspen qamtýdyń jol kartasyn iske asyrý máseleleri qaraldy, dep habarlaidy "Ult aqparat" primeminister.kz saityna silteme jasap.
Eńbek jáne halyqty áleýmettik qorǵaý ministri B. Nurymbetov, Almaty oblysynyń ákimi A. Batalov, Túrkistan oblysynyń ákimi Ó. Shókeev, Qaraǵandy oblysynyń ákimi J. Qasymbek, Jambyl oblysynyń ákimi B. Saparbaev baiandama jasady.
Jumyspen qamtýdyń jol kartasy aiasynda 6,5 myńnan asa infraqurylymdyq jobany iske asyrý kózdelgen, olar áleýmettik obektilerdi, injenerlik-kólik infraqurylymyn, sýarý jáne irrigatsiialyq júielerdi, turǵyn úi-kommýnaldyq obektilerin jóndeý men salýǵa, eldi mekenderdi abattandyrýǵa qatysty. Osynyń arqasynda 255 myń jumys orny qurylady.
Jalpy, barlyq memlekettik baǵdarlamalardy iske asyrý aiasynda 1 mln 220 myń adamdy jumyspen qamtý josparlanǵan, onyń ishinde 235 myń turaqty jumys orny qurylady.
Premer-Ministr Úkimet úshin búgingi tańda basty basymdyq turǵyndardyń jumysyn saqtaý ekenin atap ótti. Bul rette jumyspen qamtý jáne halyqtyń ekonomikalyq belsendiligin saqtaýmen qatar, infraqurylymdy jaqsartý el ekonomikasyn qalpyna keltirýde jaqsy nátije beredi.
Úkimet basshysy Shyǵys Qazaqstan, Almaty, Jambyl, Qaraǵandy, Túrkistan jáne Pavlodar oblystarynda jobalardy iske qosýdy bastaý qarqyny jaqsy ekenin atap ótti. Qyzylorda oblysy, Almaty jáne Shymkent qalalary artta qalyp keledi.
«Óńirlerdiń ákimdikterine infraqurylymdyq jobalardy tolyq iske asyrýdy bastaýdy, onyń ishinde otandyq taýarlar, jumystar men qyzmetterdiń negizgi kóleminiń otandyq bolýyn tapsyramyn. Barlyq bólingen qarajat ekonomikaǵa jumys isteýi tiis», - dedi A. Mamin.
Úkimet basshysy barlyq memlekettik organdarǵa jumyspen qamtý boiynsha josparlanǵan kórsetkishterge qol jetkizýdi qamtamasyz etýdi, al Eńbek ministrligine Jumyspen qamtýdyń jol kartasynyń, sondai-aq turaqty jumys oryndaryn qurý jáne halyqty jumysqa ornalastyrý turǵysynan basqa da memlekettik baǵdarlamalardyń iske asyrylý barysyna kún saiyn monitoring júrgizýdi tapsyrdy.
