Otandyq taýar óndirýshilerdi qoldaýǵa erekshe nazar aýdarylyp otyr. Bul týraly respýblikalyq telearnalardan kórsetilgen «Samuryq-Qazyna» ulttyq ál-aýqat qoryn basqarý jónindegi keńestiń otyrysynda QR Premer-ministri Asqar Mamin málim etti, dep habarlaidy QazAqparat.
«Úkimet «Samuryq-Qazyna» qorymen birlesip ekonomika ósimin qalpyna keltirý jáne onyń turaqty damýyn qamtamasyz qamtamasyz etýge baǵyttalǵan keshendi jospar ázirlendi. Osy jospar boiynsha biyldyń sońyna deiin iskerlik belsendilikti yntalandyrýǵa, jumyspen qamtýdy qoldaýǵa jáne halyqtyń tabysyn arttyrýǵa baǵyttalǵan júieli ári salalyq sharalar iske asyryldy. Jalpy, keshendi josparda kózdelgen sharalar 6 mln-nan astam adam jumyspen qamtylǵan birqatar salanyń qalpyna kelýine múmkindik beredi. Úkimet pen qordyń keshendi jospary aiasynda birlesken jumysynyń mańyzdy baǵyty: óńdeý ónerkásibin, kólik pen logistikany, tsifrlandyrýdy damytý, import almastyrý múmkindigin iske asyrý, shaǵyn jáne orta biznestiń ekonomikadaǵy rólin kúsheitý», - dedi Úkimet basshysy.
Osy oraida A. Mamin tiisti atqarylyp jatqan sharalar otandyq taýar óndirýshilerdi qoldaýda eleýli úles qosatynyn jetkizdi. Bul turǵyda «Samuryq-Qazynanyń» satyp alýlaryna otandyq óndirýshilerdiń qoljetimdigin keńeitý, jumys istep turǵan biznesti qoldaýda jańa tetikterdi engizý, jańa óndiristerdi qurý boiynsha baǵdarlamalardy júzege asyrý eskerilgen.
Premer-ministr qordyń satyp alýlarynda qazaqstandyq óndirýshilerdiń úlesi aitarlyqtai óskenin atap ótti. Otandyq óndirýshiler jeńil ári himiialyq ónerkásip, qurylys materialdaryn óndirý baǵyttarynda, sondai-aq mashina jasaý salasynda qamtyldy.
Sonymen qatar ol Úkimet «Samuryq-Qazyna» AQ-nyń jekeshelendirýdiń keshendi josparyn júzege asyrý merzimin qolaily kezeńde aýystyrý boiynsha usynysyn qoldaitynyn aitty.
«Aldyńǵy qatarly halyqaralyq qarjy institýttarynyń baǵalaýy boiynsha álemdik ekonomikanyń kólemi biyl 10 paiyzǵa deiin qysqarýy yqtimal. Pandemiia men shekteý sharalarynyń aiasynda jahandyq saýda kólemi de 11 paiyzǵa deiin tómendeýi múmkin. BUU Saýda jáne damý jónindegi konferentsiianyń sońǵy esebine sáikes, álemdik ekonomikada shetel investitsiiasynyń kólemi 2020-2021 jyldary 40 paiyzǵa qysqarýy yqtimal. Ásirese, áleýetti investorlar tarapynan suranystyń ýaqytsha sheteýli konteksinde osy jaǵdaida aktivterdiń uzaq merzimdi qunyna qatysty naqty túsinikti qalyptastyrý - óte kúrdeli. Sondyqtan aiqyndalmaǵan bul jaǵdaida memlekettik aktivterdi jekeshelendirý boiynsha merzimdi aýystyrý keńinen taralǵan tájiribe bolyp sanalady. Osy tektes sharalar Úndistanda, Frantsiiada, Braziliiada jáne ózge de elderde qabyldandy. Alaida, qazirgi kezdegi «Qazatomónerkásip» aktsiia paketin satýǵa qatysty ońtaily úrdisti erekshe jaǵdai dep baǵalaýǵa bolady», - dedi Úkimet basshysy.
