2020-2021 jyldarǵa arnalǵan Jumyspen qamtýdyń jol kartasy (JQJK) aiasynda 4 786 jobany júzege asyrý bastalyp, olardyń aýqymynda 64,8 myń jumys orny quryldy, dep habarlaidy "Ult aqparat".
Eńbek jáne halyqty áleýmettik qorǵaý ministrliginiń málimetinshe, JQJK aiasynda jergilikti atqarýshy oryndar 6 506 jobany iske asyrýǵa iriktedi.
Jol kartasynyń infraqurylymdyq jobalaryn iske asyrý 4 negizgi baǵyt boiynsha júrgiziledi: áleýmettik-mádeni nysandardy kúrdeli jáne aǵymdaǵy jóndeý, rekonstrýktsiialaý jáne salý (2 703 joba); turǵyn úi-kommýnaldyq sharýashylyq nysandaryn kúrdeli, ortasha jáne aǵymdaǵy jóndeý, rekonstrýktsiialaý (1 039 joba); injenerlik-kólik infraqurylymyn kúrdeli, ortasha jáne aǵymdaǵy jóndeý, rekonstrýktsiialaý jáne salý (1 799 joba); eldi mekenderdi abattandyrý (965 joba).
JQJK infraqurylymdyq jobalaryn iske asyrý kezinde otandyq óndirýshilerdiń keminde 90% taýarlary men qyzmetterin paidalanýdy qamtamasyz etý erekshe shart bolyp otyr. Jumysshylardyń kem degende jartysy halyqty jumyspen qamtý ortalyqtary arqyly alynyp, basymdyq jumyssyz júrgen jastarǵa beriletin bolady. Merdigerler sanitarlyq-epidemiologiialyq sharalardy qoldana otyryp, qaýipsiz eńbek jaǵdaiyn qamtamasyz etýge tiis.
«26 mamyrdaǵy jaǵdai boiynsha birqatar óńirde 4 786 joba turǵysynda jumys bastalyp, 64,8 myń jumys orny quryldy», - delingen vedomstvo habarlamasynda.
JQJK aiasynda barlyǵy 255 myń jumys ornyn ashý josparlanýda. Bul rette JQJK jobalary bolashaqta 100 myńnan astam turaqty jumys ornyn ashýǵa negiz bolady.
