Eńbek jáne halyqty áleýmettik qorǵaý ministri Birjan Nurymbetov Nur-Sultan, Almaty jáne Shymkent qalasynyń mańyndaǵy aýyldarda turǵanymen qaladaǵy jumysynan aiyrylǵan azaamattardy jańa «Jumyspen qamtý kartasy» jobasyna atsalysýǵa shaqyrdy, dep habarlaidy QazAqparat.
«Elimizde jańa «Jumyspen qamtý kartasy» ázirlendi. Oǵan 1 trln qarajat bólinip otyr. Sol qarajattyń esebinen elimizde 7 myńnan asa joba iske asyrylady. 240 myńnan astam jumys oryny bolady. Keshe Prezident Nur-Sultan, Almaty jáne Shymkent qalasynyń mańyndaǵy aýyldardaǵy azamattar qalaǵa kire almai, jumysynan qiyndyq kórip jatqanyna erekshe kóńil bólgen edi. Osy tapsyrma boiynsha eger aýyldaryńyzǵa, ózderińizdiń óńirlerińizge qaityp, «Jumyspen qamtý kartasynyń» jobalaryna qatysatyn bolsańyzdar, sizderge jumysqa kirisken kúni 85 myń teńge kóleminde kóterme aqy beriledi. Ol jalaqyǵa qosylmaityn bólek ótemaqy. «Jumyspen qamtý kartasy» boiynsha da jalaqynyń mólsheri 85 myń teńgeden tómen bolmaidy», - dedi Birjan Nurymbetov OKQ-da ótken baspasóz máslihatynda.
Ministr mundai sheshim qabyldaǵan jastar úshin jergilikti ákimder rekrýttyq beketter ashatynyn aityp ótti.
«Barlyq óńirge tiisti tapsyrma berildi. Jigitter, jastar óz óńirlerińizge qaitsańyzdar, «Jumyspen qamtý kartasy» sizderge jańa múmkindikterdi usynady», - dedi ol.
