10 qazanda jumysqa ketip, joǵalyp ketken Temirtaý qalasynyń 20 jastaǵy turǵyny Erhan Tájibaev tabyldy. Bul týraly Qaraǵandy oblysynyń Politsiia departamenti ókilderi aitty, - dep habarlaidy Tengrinews.kz.
Búginde Erhan Tájibaev jaqyndarynyń qasynda. Buǵan deiin qaida bolǵany ázirge belgisiz.
"Izdestirý jumystarymen Politsiia departamentiniń barlyq jeke quramy ainalysty. Júrgizilgen jedel-izdestirý sharalarynyń nátijesinde jigit tabyldy. Ol aman-esen. Istiń mán-jaiy anyqtalyp jatyr", - dedi Qaraǵandy oblysy PD baspasóz qyzmetiniń ókilderi.
Joǵalǵan jigittiń týystary Erhannyń jaǵdaiy jaqsy ekenin rastady.
"Erhannyń mundai áreketke barýynyń bir sebebi bar shyǵar. Qalasa ózi aitady. Biz úshin bastysy - onyń din aman bolýy. Izdestirý jumystaryna atsalysqan barlyq adamǵa raqmet", - dedi Erhannyń týystary.
Eske salaiyq, keshe, 13 qazanda 20 jastaǵy temirtaýlyqty týystary birneshe kúnnen beri izdep jatqany habarlanǵan bolatyn. Erhan Tájibaev Qaraǵandyda saýda ortalyǵynda satýshy-keńesshi bolyp jumys isteitin. Sporttyq kiimder satady.
"Ulymdy esikke deiin shyǵaryp saldym. Ol úiden saǵat 10.00-de shyǵyp ketti, anasyna jumysqa barǵanyn aityp, qońyraý shalý kerek edi. Biraq habarlaspady. Biz alańdai bastadyq. Saǵat 11.00-de telefony óshti, biz telefonynyń qýaty taýsylǵan shyǵar dep oiladyq. 12.00-de, 13.00-de qońyraý shaldyq. Telefony óship turdy. 15.00-de áielim onyń jumysyna bardy, ol jerde bolmaǵan", - degen edi ákesi.
