Elektrondy eńbek birjasy jumys izdeýshige bos vakansiialardy avtomatty túrde usynatyn bolady. Bul týraly Úkimet otyrysynda QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy "Ult aqparat".
«Jumyspen qamtý salasynda Elektrondy eńbek birjasynyń múmkindikterin keńinen paidalaný kózdeledi. Búgingi tańda jumys izdep júrgen adam Jumyspen qamtý ortalyǵyna baryp, kezekke turyp, tiisti jumys tańdaý úshin ortalyq qyzmetkerimen bailanys jasaýǵa májbúr. Endigi kezde barlyq jumyspen qamtý sharalary, quraldary, bos jumys oryndary Elektrondy eńbek birjasynda qalyptasyp, portal jumys izdep júrgen adamǵa daǵdylaryna sáikes avtomatty túrde bos jumys oryndaryn, «Eńbek» baǵdarlamasy quraldaryn usynatyn bolady», - dedi ministr.
Iaǵni, onyń naqtylai túsýinshe, sheshimdi aqparattyq júie qabyldaidy.
«Jumys tabylmaǵan jaǵdaida aqparattyq júie avtomatty túrde adamdy jumyssyz retinde tirkeidi. Oǵan jumyssyzdyqqa bailanysty tiisti áleýmettik tólemdi proaktivti túrde eseptep, taǵaiyndaidy. Osylaisha, birneshe qyzmetti biriktirip, biznes protsesin jeńildetip, tsifrlyq jumyspen qamtý ortalyqtaryna kóshý jolyndamyz», - dedi Birjan Nurymbetov.
