Jumys berýshi Abai shahtasyndaǵy tótenshe oqiǵa boiynsha tekserý júrgizgen Úkimettik komissiia shyǵarǵan qorytyndymen kelisip otyr. Bul týraly QR Tótenshe jaǵdailar ministri Iýrii Ilin málim etti, dep habarlaidy QazAqparat.
«Biz jumys berýshiniń kinásiniń dárejesin anyqtadyq. Aldaǵy ýaqytta tergeý organdary qozǵalǵan qylmystyq is sheńberinde jumys isteidi. Komissiianyń tujyrymdary osyndai, aktilerge múshelerdiń bári qol qoidy. Jumys berýshi ondaǵy dáiekterdiń bárimen kelisip otyr. Osy oqiǵada qaza tapqandardyń otbasy múshelerine áleýmettik paketti de qarastyrýǵa mindet aldy», - dedi Iýrii Ilin Qaraǵandy oblysyndaǵy óńirlik kommýnikatsiialar qyzmetinde ótken brifinginde.
Ministrdiń málimeti boiynsha, komissiia jumys berýshi «Arselor Mittal» kompaniiasyn eńbek qaýipsizdigine baǵyttalatyn qarajat kólemin arttyrýǵa mindettegen.
«Aldaǵy ýaqytta «Arselor Mittal» kompaniiasy kómir kenishi men metallýrgiia kombinatynda qaýipsizdikti qamtamasyz etýge arnalǵan qarjy kólemin ulǵaitý boiynsha úkimetpen kelisimge qol qoiýdy kózdep otyr», - dedi vedomsvto basshysy.
