«BUU - Áielder» qurylymynyń jobalyq menedjeri Gúlnar Smaiylova halyq ishinde beibit jiyn ótkizý mádenietin kóterý boiynsha jumys júrgizý kerektigin atap ótti, dep habarlaidy QazAqparat.
«Memleket úshin osynaý mańyzdy zańdy ázirlegenderińiz úshin rahmet. Osy zańdy qabyldaýmen birge halyqtyń tanym-túsinigin arttyrý boiynsha, iaǵni beibit túrde jinalýdyń mádeni amal-ádisterin de úiretý kerek degen pikirdemin. Bálkim qoǵamdyq keńesterde, máslihattardyń alańynda adamdardyń qalai beibit jinalatynyn, qalaisha sypaiy amal-ádister arqyly oi bildirýge bolatyny jaily tyńdaý ótkizgen jón bolar», – dedi Gúlnar Smaiylova beibit jiyndar týraly zań jobasynyń talqylaýynda.
Ol sonymen qatar jalpy jaǵdaidy mitingke ulastyrýdyń qajeti joqtyǵyn aitady.
«Beibit jiyndarǵa jetkizbei-aq qoǵamdyq keńester men máslihattarǵa baryp, iaǵni mitingke jinalmai-aq el pikirin tyńdai alatyndai jumys júrgizgen abzal. Qoǵamdyq qaýipsizdik pen halyq únine qulaq asatyn memleket dep aityp júrgenimizdei, jiyndarǵa jetkizbei-aq halyqty tyńdai bilýge bolady», - dedi Gúlnar Smaiylova.
Óz kezeginde Eýropadaǵy qaýipsizdik jáne yntymaqtastyq uiymy baǵdarlamalary keńsesiniń basshysy Derd Sabo zań jobasyna oń baǵasyn berdi.
«Zań jobasy dál osylai ázirlenýi kerek. Jumys barysy bizdiń kóńilimizden shyǵyp otyr. Ártúrli orynda, ártúrli deńgeide pikirtalastar bolyp jatyr. Osynyń bári jańa ári baǵyty durys zańnyń dúniege kelýine muryndyq bolar degen senimdemin», - dedi Derd Sabo elordada zań jobasy talqylanǵan jiynnan keiin tilshilerdiń suraǵyna jaýap bere otyryp.
Spiker Eýropadaǵy qaýipsizdik jáne yntymaqtastyq uiymy bul úrdiske úles qosýǵa daiyn ekenin bildirdi.
«Dál osy suraqtarmen ainalysatyn institýttarymyz, EQYU-nyń jeke bólimsheleri bar. Uiymǵa múshe memleketterdiń ótinishi boiynsha sarapshylyq pikir bildirip otyrady. Bizdiń uiym bul zań jobasyna taldaý júrgizýge daiyn», - dedi Derd Sabo.
Aita ketsek, elordada búgin QR Aqparat jáne qoǵamdyq damý ministri Dáýren Abaevtyń tóraǵalyǵymen beibit jiyndar týraly zań jobasyn jetildirý máselesi talqylandy.
Is-sharaǵa QR Syrtqy ister vitse-ministri Erjan Ashyqbaev, Eýropadaǵy qaýipsizdik jáne yntymaqtastyq uiymy baǵdarlamalary keńsesiniń basshysy Derd Sabo, USAID-tiń Nur-Sultandaǵy Keńsesiniń direktory Raian Ýedl, Qazaqstan Respýblikasyndaǵy BUU Adam quqyqtary jónindegi Joǵarǵy Komissar basqarmasynyń ókili Leila Dúisekova, sondai-aq Germaniia, Ulybritaniia, Niderlandy, AQSh-tyń Qazaqstandaǵy elshilikteriniń ókilderi qatysty.
