Foto: KTK kadry
Almaty oblysynda 56 jastaǵy áieldiń ólimine bailanysty tergeý júrgizilip jatyr. Onyń denesi Almaty mańyndaǵy qaraýsyz qalǵan zaýyttyń janynan tabylǵan. Marqumnyń týystary onyń densaýlyǵyna eshqashan shaǵymdanbaǵanyn aitady, - dep habarlaidy Ult.kz KTK telearnasyna silteme jasap.
Qaitys bolǵan áieldiń esimi Zivanzahan. Tańerteń onyń denesin aýyl turǵyndary qaraýsyz qalǵan kirpish zaýytynyń janynan kezdeisoq taýyp alǵan.
"Balalar júgirip kelip: "Táte, beri kelińizshi! Munda áiel qardyń ústinde jatyr, ony kótere almai jatyrmyz" dedi. Bárimiz osynda keldik. Kelinimiz tez áreket etti. Denesi jyly bolatyn. Biz tiri dep oiladyq. Kelinimiz dereý jedel járdem shaqyrdy. Biraq dárigerler onyń qaitys bolǵanyn aitty", – dedi Jańyl Omarova esimdi aýyl turǵyny, ol politsiiaǵa habarlaǵan.
Týystarynyń aitýynsha, Zivanzahan sol keshte kafeden shyǵyp, úiine oralmaǵan. Ony izdeý jumystary túni boiy jalǵasqan.
"Keshki 5-te ol kafeden shyqqan, úige deiin shyǵaryp salǵan deidi. Sodan keiin ony eshkim kórmegen. Kelesi kúni tańerteń ony aýyl balalary 10 minýttyq jerde – qardyń ústinde, BAKAD mańynda tapqan. Ol jerde bos jerler ǵana bar. Onyń ol jaqqa qalai barǵany túsiniksiz. Bul bárimizge jumbaq", – dedi marqumnyń jieni Bahtiiar Maqsutov.
Jaqyn mańnan aýyl turǵyndary áieldiń sómkesi men uialy telefonyn tapqan. Politsiia marqumnyń denesinen zorlyq-zombylyq belgileri tabylmaǵanyn habarlady. Qazirgi ýaqytta sol keshte áieldi kórgen kýágerler izdestirilip jatyr. Múmkin, olar bul jumbaq ólimniń syryn ashýǵa kómektesedi.
Eske salaiyq, 17 jeltoqsanda Almaty mańyndaǵy aýyldan áieldiń denesi tabylǵany belgili boldy. Politsiia bolǵan oqiǵanyń mán-jaiyn obektivti anyqtaý úshin barlyq qajetti tergeý áreketterin júrgizip jatqanyn habarlady. Aldyn ala málimetter boiynsha, zorlyq-zombylyq belgileri anyqtalmaǵan.
