Qurylys salýshylar kompaniia brendin baspanalardy jarnamalaý úshin paidalanýda. Bul týraly Úkimet otyrysynda QR Básekelestikti qorǵaý jáne damytý agenttiginiń tóraǵasy Serik Jumanǵarin aitty, dep habarlaidy QazAqparat.
«Tanymal qurylys salýshylar kompaniianyń brendin alyp, qurylysty júzege asyrmai, nysandy jarnamalaý úshin paidalanady. Turǵyn úidi salý jáne satý protsesin qurylys salýshynyń ýákiletti kompaniialary bolyp tabylmaityn úshinshi tulǵalar júzege asyrady. Bul nysannyń qurylysy úshin jaýapkershilikten, sondai-aq monopoliiaǵa qarsy jáne salyqtyq baqylaýdan ketýge jol ashady», - dedi agenttik tóraǵasy.
Onyń atap ótýinshe, qurylys salýshylarmen zańdy bailanysy joq uiymdar satqan páterlerdi satyp alýshylar quqyqtyq kepildiksiz qalýda. Bul turǵyn úi sapasyna jáne nysandardy tapsyrý merzimine qatysty jappai shaǵymdardyń kóbeiýine sebep bolyp otyr.
«Kelisimsharttyń negizsiz sharttaryn mindetteý tájiribesi keńinen taralýda. Bul - qurylys salýshylarmen, úlestes basqarýshy kompaniialarmen, bailanys, internet qyzmetteri, kabeldik teledidar operatorlarymen kelisimshart jasasý, parking satyp alý boiynsha talaptar. Osylaisha, monopoliialyq qurylys naryǵy kórshiles naryqtardaǵy básekelestikti shekteidi», - dep atap ótti Serik Jumanǵarin.
