Senat depýtaty Baqytjan Jumaǵulov sóz bostandyǵyn jeleý etip, áleýmettik jelilerde jalǵan aqparat taratpaýǵa shaqyrdy, dep habarlaidy Sputnik Qazaqstan.
Depýtat óz úndeýin BAQ ókilderi men quryltaishylaryna, ǵalamtor jelisinde otyrǵan blogerlerge, sondai-aq, ártúrli partiialar men qoǵamdyq uiymdardyń jetekshilerine, saiasatkerler men úkimettik emes uiymdardyń múshelerine arnady.
"Qazaqstanda sóz bostandyǵy joq dep kim aita alady?! Derekterge qarasaq, elimizde 2700-den astam BAQ tirkelgen. Olardyń 70 protsentten astamy ártúrli partiialar men qoǵamdyq uiymdarǵa tiesili. Oǵan ǵalamtordy qosyńyzdar. Iaǵni aqparat alý men taratýdyń múmkindikteri jetkilikti. Ashyq saiasatta júrgendikten, memlekettik qyzmetkerler, ártúrli deńgeidegi depýtattar oryndy-orynsyz aitylyp júrgen syndarǵa tózimdilikpen qaraidy?", - dedi depýtat senattyń jalpy otyrysynda.
Biraq, onyń aitýynsha, keide adami, imani, rýhani turǵydan shekten shyǵyp, shyndyqqa janaspaityn aqparat taratatyndar bolady. Ol mundai jaǵdai postkeńestik júiede ádetke ainalyp bara jatqanyn tilge tiek etip, bul depýtattardy alańdatatynyn jetkizdi.
"Internetti ashyp qalsańyz, áleýmettik jelige kóz salsańyz, birde Túrikmenstannyń prezidenti, birde Reseidiń prezidenti o dúnielik bolyp ketipti dep, ózderi kózben kórgendei tamsanyp jazady. Ózimizdiń elge qatysty jańsaq aqparatty da oqyp qalamyz. Mundai kóripkeldik pen sáýegeiliktiń quny qansha? Bolmasa, prezident ómirden qashan ótedi dep saiasi boljam jasaidy. Ne musylmandyq, ne hristiandyq dini ustanymǵa kelmeitin, ne adami bolmysqa jatpaityn ótirik aqparat úshin kim jaýapty?", - deidi depýtat.
Jumaǵulov adam degen atqa laiyq bolýǵa shaqyrdy.
"Bárimiz Qudaidyń qulymyz, dám taýsylǵan kúni bul fáni dúnieden ozamyz. Sondyqtan da adam degen atqa laiyq bolaiyq, ulttyq qundylyqtarymyzdy saqtaiyq, sóz bostandyǵy degendi jeleýletip, shyndyqqa kúie jaqpaiyq", - dedi ol.
Osy oraida senator uly Abaidyń "atymdy adam qoiǵan soń, qalai nadan bolaiyn"degen ataly sózin aityp ótti.
"Quqyq qorǵaý organdary qaida qarap otyr, úkimet nege shara qoldanbaidy degen sózden ádeii qashyp otyrmyn. Janshý, qamaý, aiyptaý saiasaty emes, ár adamnyń uiat-ojdanyna salyp otyrmyn", - dedi depýtat.
Jumaǵulov áleýmettik jeliler arqyly shyndyqqa janaspaityn aqparatpen jurtty aldamaýǵa úndedi.
"Ádilettiń aq jolynan taimaiyq. Oilap sóileiik. Óz alańdaýshylyǵymdy azamat retinde ortaǵa salǵanymdy sizder durys túsinedi dep oilaimyn", - dep qorytty sózin depýtat.
