Ál-Farabi atyndaǵy Qazaq Ulttyq ýniversitetiniń Jýrnalistika fakýltetinde Baspagerlik, redaktorlyq jáne dizainerlik óner kafedrasynyń uiymdastyrýymen «Jumadilov oqýlary» ótti. Tuńǵysh ret ótkizilgen «Jumadilov oqýlary» Halyq jazýshysy, Memlekettik syilyqtyń iegeri Qabdesh Jumadilovtiń shyǵarmashylyq jáne jeke portretin talqylaýǵa arnaldy.
Is-shara Q.Jumadilov shyǵarmashylyǵyna arnalǵan kitap kórmesin tamashalaýdan bastaldy. Jiyndy jýrnalistika fakýltetiniń dekany Temirǵali Kópbaev ashty jáne jiyn barysyna moderator boldy. Ol Qabdesh Jumadilovtiń jazýshylyǵy, qairatkerligi týraly stýdentterge tanymdyq-taǵylymdyq esteligin aityp berdi:
«Qabdesh Jumadilov – ómiriniń sońyna deiin ádildiktiń jolynan aýytqymady. Ol – qazaq tarihyn kórkem shyǵarmaǵa ainaldyrǵan qurmetti qalamger», – dedi T.Kópbaev. Filologiia ǵylymnyń doktory, professor Káken Hamzin Qabdesh Jumadilovtyń jazýshylyǵymen qosa jýrnalistik qyryn da taldap berdi: «Ol qazaq tulǵalarynyń, taǵdyrly jazýshylardyń ómirderegi týraly maqalalar da jazdy. Ustazy Qapan Satybaldin týraly estelikteri de áli kúnge tanymdyq, taǵylymdyq ónegesi mol eńbek», – dei kele «Jas qalam» áni avtorynyń tabylýyna qatysty da Q.Jumadilovtyń jazbalary sebep bolǵanyn atap ótti.
Filologiia ǵylymynyń doktory, ǵalym Rýda Zaikenova Qabdesh Jumadilovtyń jazýshylyq qyryn ǵylymi jolmen taldap berdi. Al «Qazaq gazetteri» JShS Bas direktordyń orynbasary – Almaty filialynyń jetekshisi Dýman Anash Q.Jumadilovtiń tarihi eńbekteriniń mańyzyn taldady. Aqyn, Memlekettik syilyqtyń laýreaty Ulyqbek Esdáýlet jazýshy shyǵarmashylyǵynyń stýdentterdiń tanym kókjiegin damytatynyn aita kele Qabdesh Jumadilovt pen Qajytai Iliiasovtyń arǵy betten oralǵandaǵy oqiǵasyn óleń tilinde sóiletip, «Qabdesh – Qajytai hikaiasy» degen óleńin oqyp berdi. «Qabdesh oqýlary – qazaq tiliniń oqýlary, qazaq mádenietiniń, táýelsizdiktiń oqýlary degen sóz», – degen aqyn Almas Ahmetbek te Q.Jumadilovke arnaǵan óleńin oqydy.
«Qabdesh Jumadilov» qoǵamdyq qorynyń tóraǵasy, jazýshynyń uly Arman Jumadilov stýdentter men jas ǵalymdardyń ǵylymi izdenisin arttyrý, shyǵarmashylyq oilary men jańa ideialaryn júzege asyrýǵa yqpal etý maqsatynda arnaiy baiqaý uiymdastyrǵanyn atap ótti.
Eń úzdik ǵylymi jumysqa, eń úzdik baspasóz materialyna jáne úzdik ǵalamtor jariialanymyna jariialanǵan baiqaý qorytyndysy nátijelerimen qalamgerdiń uly Arman Qabdeshuly jáne Baspagerlik, redaktorlyq jáne dizainerlik óner kafedrasynyń meńgerýshisi Aigúl Ramazan tanystyryp, stýdentterdi marapattady. Qabdesh Jumadilovtiń shyǵarmashylyǵy jáne pýblitsistik qyry, redaktorlyq sheberligi men ónegeli ómirin arqaý etken «Úzdik ǵylymi jumys» atalymynda Nurdáýlet Baitiles (1-oryn), Shuǵyla Ábdibai (2-oryn), Dinara Boranbai (3-oryn) marapattalsa, «Úzdik ǵalamtor jariialanymy» atalymy boiynsha Aiǵanym Qýandyq (1-oryn), Erasyl Sailaýǵaliev (2-oryn), Ámina Ónerbai, Nyǵmet Táliphan, Didar Baqytbek, Shaiyn Shaihymurat (3-oryn) júldeger atandy. «Úzdik baspasóz materialy» atalymynda Malika Salieva (1-oryn), Altynai Seiitken (2-oryn), Gúlnar Baimuhan, Mádina Ibragim, Áli Qasymbaev (3-oryn) top jardy.
Sonymen qatar Súnbek Symbat, Tańsholpan Aqberdieva, Jalyn Seidiǵalymova, Bibinur Qulmahanbet, Hamza Berden, Maqpal Ádilhanqyzy, Sanjar Seisenbaev «Alǵys hatpen» marapattaldy. Stýdentterdi «Jumadilov oqýlaryna» ázirlegen jetekshilerine de «Alǵys hat» tabystaldy.
Nazerke DÁLELHANQYZY,
Baspagerlik, redaktorlyq jáne dizainerlik
óner kafedrasynyń oqytýshysy
