Foto: adyrna.kz
Ulttyq quryltai – elimizdegi úlken dialog tetigine ainalǵan ózekti basqosý alańy ekenine buǵan deiingi ótken otyrystarda kóz jetkizdik. Bul týraly Ulttyq quryltai múshesi, Májilis depýtaty Juldyz Súleimenova Ult.kz habarlaidy."Biz uzaq jyldan beri qordalanyp, túiini tarqamaǵan túitkildi máselelerdi osy dialog alańynda talqyǵa salyp, zańnamalyq tártippen rettep, tiisti sheshimderin qabyldadyq" dep otyr Juldyz Súleimenova.
"Árine, munyń bári ońailyqpen kele qoimady. Ýaqyt óte kele Memleket basshysy bastaǵan quryltai músheleriniń barlyq bastamasy durys ekeni dáleldene bastady. Osy rette lýdomaniiaǵa qarsy kúrestegi zańnamalyq jetistikti airyqsha ataýǵa bolady. Statistika kórsetkendei, bul dert memlekettik qyzmetshiler men áskerilerdiń de arasynda keń tarap ketken. Endigári mundai ziiandy keseldiń taralýyna tosqaýyl qoiylyp, jalpy osy oiyn biznesine múldem tyiym salyndy.
Sonymen qatar, áielder men balalardyń quqyqtaryn qorǵap, qaýipsizdigin qamtamasyz etý de der kezinde qolǵa alynyp, tiisti zań qabyldandy. Bul zańnyń talqylanyp kele jatqanyna segiz jylǵa jýyqtady. Onyń ishinde, mysaly, densaýlyqqa qasaqana jeńil ziian keltirý, uryp-soǵý baptary kriminalizatsiialandy. Osy zańnyń arqasynda qoǵamda zań jáne tártip qaǵidaty rettelip, jumys istei bastady. Keiingi jyldary balalar arasyndaǵy býlling, bir-birin aiaýsyz urý syndy keleńsizdikter keń etek alyp ketti. Adamgershilik qundylyqtar qurdymǵa ketip bara jatqany baiqalady. Sol sebepti el jastaryn tártipke baǵyndyryp, tezge salatyn bir qujattyń qabyldanatyn kezi keldi. Odan bólek Ákimshilik quqyq buzýshylyq kodeksine de ózgerister engizilip, býllingke qarsy sharalar qolǵa alynyp, tiisti jaýapkershilik qarastyryldy", -deidi J. Súleimenova.
Onyń ústine esirtki ainalymy, veipterdiń ashyq satylymy syndy ózekti máseleler de kún tártibinen túspei ketti. Budan bylai osy ziiandy zattardyń jarnamasyna tyiym salý arnaiy zańmen rettelmek ekenin aitqan depýtat ótken otyrystarǵa kóz júgirtsek, quryltaida kóterilgen máselelerdi negizge ala otyryp, 10 zań jobasyna bastamashylyq jasalyp, 9 zań qabyldandy dep otyr.
"Al Ulttyq quryltaidyń Býrabaida ótken tórtinshi otyrysynda da Memleket basshysy Qasym-Jomart Toqaev el nazaryndaǵy túitkildi máselelerdi qaýzap, tiisti tapsyrmalaryn berdi. Prezident biylǵy Jumysshy mamandyqtary jylynyń mańyzy jaily da az aitpady. Jasyratyn nesi bar, biz eńbek adamy jaily kóp aitpaityn bolǵanbyz. Bul turǵydaǵy nasihatqa sońǵy úsh jylda ǵana moiyn bura bastadyq. Bizdiń qoǵamnyń keibir músheleri kósheni, aýlany lastap jatyp muny erteń kim jinaidy degen máselege bas qatyrmaityn bolǵan. Quddy bir bári óz-ózimen tazalana qalatyn siiaqty bizge. Sol aýyr jumystyń artynda qanshama adamnyń mańdai teri, adal eńbeginiń jatyr.
Qasym-Jomart Kemelulynyń bastama kóterýimen jariialanǵan Jumysshy mamandyqtary jyly eldiń igiligine, damýyna aianbai eńbek sińirip júrgen qanshama qarapaiym jannyń dárejesin kótere túsedi degen senimdemiz.
Ekinshiden, Memleket basshysy shalǵaidaǵy, shekaradaǵy aýyldar máselesine de nazar aýdaryp otyr. Bul rette biz «Diplommen – aýylǵa» baǵdarlamasyn jańartyp, aýylǵa attanǵan mamandardyń materialdyq jaǵdaiyn kóterý máselesin de talai minberde aittyq.
Úshinshiden, kitap oqý jaiy da alańdatady. Keiingi úsh jylda kitaphanashy mamandardy daiarlaý, jalpy, kitap oqý bastamasyn jii-jii kóterip júrmiz. Memleket basshysy da buǵan kóńil bóldi", -dep sózin túiindedi depýtat Súleimenova.
