sýret ashyq derekkózden alyndy
Almaty oblysy Mejdýrechensk aýylynda jaǵaustatarlyq jaǵdai boldy. 9-synyp oqýshysy 15 jasynda júkti bolyp, bala dúniege ákelgen. Qyzdyń ózi men ata-anasy bul jaitqa kórshisin kinálap otyr. Bul týraly "Kóremiz" baǵdarlamasynda aitylǵan, - dep habarlaidy Massaget.kz portaly.
9-synyp oqýshysy Dinaranyń anasy Merýert Sheńgelbaevanyń aitýynsha, qazanda qyzy aýyra bastaǵan. Alǵashynda tumaý bolǵan. Keiin anasy qyzy aýyra bergen soń sekemdenip, júktilikti anyqtaityn test salyp kórgen. Eki ret baiqap kórgende de nátijesi oń shyqqan.
Dinara 2007 jyly dúniege kelgen. Ol - otbasyndaǵy úshinshi bala. Bul úidegi alǵashqy qyz ben er bala áieldiń birinshi nekesinen, al Dinara men onyń sińlisi ekinshi nekeden týǵan. Merýert Sheńgelbaevanyń sózinshe, kórshileri Dinara atty qyzyn keide kómekke, keide qonaqqa ketkende qyzynyń janyna otyrýǵa shaqyratyn bolǵan. Al bul iske qatysy bar dep kúdiktenip otyrǵan kórshisi Adaldyń 4 balasy bar, 53 jasta.
"Qyrkúiekten beri 3 ret bardy (kórshisiniń úiine - esk.). 1 shaqyrym jerde turady. Keiingi kezde qyzym barǵysy kelmedi. Jibermei qoidyq. "Úiine barsań, ydys jýǵyzyp qoiady. Tósek jinatyp qoiady" dedi", - dep túsindirdi qyzdyń anasy jaǵdaidy.
Qyzdyń anasy kórshisimen 3 jarym jyldan beri aralasqandaryn jetkizdi. Al bul jaǵaustatarlyq jaǵdai mamyrdyń aiaǵynda bastalǵan. Qyrkúiekten keiin qyzdyń ózi de kórshisiniń úiine barýdan bas tartypty.
"Birinshisinde úiin jinaýǵa kómektessin" dep shaqyrǵan. Kóligine otyryp bardym. Bara jatqan jolda basqa jolǵa burylyp ketti. "Jolda politsiia qyzmetkerleri bar. Kóligimniń bir jeri durys emes. Sondyqtan basqa jolmen baramyz" dedi. Eshkim júrmeitin jolmen bardy. Bara jatqan jolda toqtady. "Kólikten túse turshy" dedi. Men "túspeimin, jetken joqpyz ǵoi" dedim. Ózi shyqty da esigin ashyp, meni shyǵaryp, júksalǵyshqa apardy. Boldy. Bitken soń bireýge aitsań, sińlińe tiisemin dedi. Úige qaityp bara jatqan jolda "ákeń men shesheń "nege erte keldińder?" dese, "páter jaldaýshylary kelip qaldy, jinai almai qaityp kettik" dep ait dedi", - deidi qyzdyń ózi bul jaǵdai týraly.
Dinaranyń ata-anasy kúdiktiniń atyna aryz jazǵan. Alaida ol 10 kún ótken soń bosap shyqqan. Sondai-aq, qyzdyń sózinshe, oqiǵa alǵash ret kólikte bolǵan. Al politsiia kólikti synamaǵa jiberetinderin aitqan. Bul jaǵdaidan qyzdyń ákesi de habardar eken.
"Qolyna pyshaq alyp ketti (qyzdyń ákesi - esk.). Julyp aldym. Kóligimen bizdiń úidiń mańynan kele jatyr eken (kórshisi - esk.). "Ne istediń qyzyma?" degen, "dálelde, dáleldei alsań" degen", - dedi qyzdyń anasy.
Dinaranyń júkti ekenin 18 qarashada áielinen bilgen Ońdasyn Myńbaev birneshe ret qyzynan oqiǵanyń ras-ótirigin surapty.
"Ákesi suramaidy ondaidy, uiat bolsa da qyzymnan suradym. "Bireýge jala jappaiyq" dedim. "Sol, áke" dedi. Bárin anyqtap aityp berdi. Meniń aýmaǵyma mal jaiatyn. Balalar teń boldy. Ózim jaqtyrmaityn edim. Áielder jóninde aitatyn. Kóringenge qyzyǵatyn, áielqumar edi", - deidi qyzdyń ákesi.
Al Adal esimdi kórshisi bul jaǵdaiǵa kináli qyzdyń 19 jastaǵy ógei aǵasy ekenin jetkizgen. Óitkeni ol mamyrda asyǵys áskerge attanypty. Biraq qyzdyń ata-anasy aǵasynyń qaryndasyna bulai isteýi múmkin emes ekenin aitqan. Sondai-aq, Dinara da kórshisi ekinshi ret úiinde (kórshisiniń - esk.) tiiskenin málimdegen.
"Bólmeni jinastyryp jibershi" dedi. "Jaraidy" dep bardym. Bólmege kirdim, ol da artymnan kirdi. Esikti japty, esik jabylmady, oryndyqpen tirep qoidy. Maǵan qaita-qaita tiise bastady. "Qoiyńyz" dedim. Qoiǵan joq. Tósekke jatqyzyp sheshindirip, istedi de maǵan "sińlińe osy jaǵdai bolǵanyn qalamasań, eshkimge aitpa" dedi. Qoryqqanymnan eshkimge aitqan joqpyn", - dedi Dinara.
Shildeniń basynda júktiliktiń alǵashqy belgileri paida bolǵan. Al qyz bul kezde Aqtóbede týystarynyń úiinde bolǵan.
"Aqtóbede júrgende qusqym keldi. Sýdyń dámi birtúrli boldy. Jaqpai qalǵan bolar dep anama aittym", - deidi 9-synyp oqýshysy.
Mektep ákimshiligi de aryz jazylǵan kúnnen beri bul jaitty bilgen.
"Dinara salmaqty, tuiyq minezdi. Sabaǵyn jaqsy oqidy. Otyrystar men bi keshterine qatyspaityn. Eshqandai ózgeris baiqamadyq. Bárimiz, pán muǵalimderi qatty tańǵaldyq. Basqa, basqa, ol qyzdan ondai nárse kútken joqpyz. Tynysh júretin qyz edi. Qinalyp júrgenin de baiqap júrgen joqpyz", - deidi onyń synyp jetekshisi Janar Jakeeva.
Almaty oblystyq Politsiia departamenti málimetinshe, bul is Ile aýdandyq Politsiia basqarmasynda tirkelgen. Sot saraptamalary daiyndalǵan. Alaida kólikten eshqandai biomaterial tabylmaǵan.
Dinara aman-esen bosanyp, qyz týǵan. Oǵan Botagóz degen esim tańdalǵan. Al jábirlenýshi qyz baǵdarlama barysynda náresteni týystary asyrap alatynyn aitqan.
Sondai-aq, DNQ synamasy da alynǵan. Alaida onyń qorytyndysy 1 aidan keiin daiyn bolady. Al bul jaǵdaiǵa kórshisi kináli ekeni dáleldense, kámeletke tolmaǵan qyzǵa zorlyq kórsetkeni úshin ol 17 jylǵa bas bostandyǵynan aiyrylýy múmkin.
