Sońǵy jyldary sóz qadirin biletin azamattardyń kóńiline qaiaý túsiretin, bir qaraǵanda ózi eleýsizdeý kóringenmen, bizdiń qazaqi bolmysymyzǵa jat bir ádet qalyptasty. Ol – janyndaǵy aiaýly jan-jaryn, jubaiyn, zaiybyn, Qudai qosqan qadirmendi qosaǵyn «joldasym» dep tanystyrý nemese aitý. Buny bizdiń halyqtyń kóp elikteitin, irgemizdegi kórshi eldiń «tovarish» sóziniń tikelei aýdarmasy desek te bolady.
Ol kezde búkil 15 respýblikanyń halqy túgelimen birin-biri "joldas" dep atady, bizde de solai qalyptasty. Alaida, ony orystardyń ózi de qabyldamady. Sol kezden «saǵan Tambov «qasqyry» joldas» degen kekesin sóz tirkesi qaldy. Al, qazaqta «joldas» sózi ýaqytsha serik degen maǵyna beredi. Mysaly, jolǵa birge shyqtyń, barar jerińe jetkesin jónińe ketesiń. Jumystas áriptester men birge oqityndar da bir-birine joldas. Olar búgin bar, erteń joq. Sebebi, jumys oryndy jii aýystyrý túk emes, oqý da saǵyzdai sozylmaidy. Bitirgesin árkim óz jónimen ketedi. Al, jubaiyń (Qudai qosqan qosaǵyń, jan-jaryń, balalaryńnyń anasy, otbasyńnyń qamqorshysy) - ózińmen birge ómir jolyna juptasa attanyp, óle-ólgenshe janyńda bolýǵa serttesken adam. Sonda ol saǵan qalaisha «joldas» bolady?!
Bul Keńes zamanynan beri kele jatqan sanadaǵy sarqynshaq. Ol kezde, «Jańa qoǵam ornatamyz» dep tektilikti bildiretin «myrza», «hanym» degen sózderdi joiyp, bárin biryńǵai sup-sur tobyrǵa «joldasqa» ainaldyrǵan.
"Qazaqstan ajyrasýdan alǵashqy ondyqqa kirdi" dep habarlaidy «Alash ainasy», taǵy bir gazet «Musylman elderi arasynda kósh bastap turmyz» dep jazypty...
Atam Qazaqtyń «Jaqsy sóz - jarym yrys» degeni osy bolsa kerek. Allanyń qalaýy: ne oilap, ne aitsań sol bolady. Alla jaqsylyqty da, jamandyqty da adamdardyń piǵylyna qarai beremin degen. Ózderińiz kórip otyrǵandai, «Qudai qosqan qosaǵym» dep júretin shaqtarda eshkim ajyrasqan joq, «joldas» boldyq - ajyradyq.
BIR-BIRIMIZGE JAQSY SÓZ AITYP, ALLADAN JAQSY TILEK TILEIIK!
Qojyrbaiuly Muhambetkárim, Mańǵystaý
.jpg)