Shymkentte Qazaqstan men Ózbekstan Respýblikalarynyń arasyndaǵy óńiraralyq birinshi yntymaqtastyq forýmy bolyp ótti. Qos memlekettiń delegatsiialaryn Birinshi Premer-Ministrler Asqar Mamin men Achilbai Ramatov bastady. Al forýmnyń basty taqyryby - shekara mańyndaǵy saýda-sattyq pen investitsiialyq jáne ekonomikalyq qatynastardy damytý.
Forým barysynda taraptar keń aýqymdy máselelerdi, sonyń ishinde, Qazaqstan men Ózbekstannyń isker toptary men óńirleri arasynda ózara tiimdi jáne praktikalyq yntymaqtastyqty jolǵa qoiý máselelerin talqylady. Budan basqa, ekonomikanyń shikizattyq emes sektorlaryndaǵy ekijaqty ózara is-qimyldy damytýǵa, eki eldiń eksporttyq əleýetin ulǵaitýǵa nazar aýdaryldy.
Sonymen qatar, forýmda Túrkistan oblysynyń ákimi Janseiit Túimebaev búgingi is-shara Qazaqstan men Ózbekstan arasyndaǵy ózara yntymaqtastyq pen berik bailanystardy, dostyq qarym-qatynasty qalyptastyrýǵa taǵy bir qadam ekenin atap ótti.
"Osy jyldy Prezidentimiz Qazaqstandaǵy Ózbekstan jyly dep jariialady. Bul bizdiń halyqtarymyzdyń baýyrlastyq qarym-qatynasyn taǵy da dáleldeidi. Bizdi Ózbekstanmen tyǵyz kópǵasyrlyq tatý kórshilik túiinderi, mádeniet ortaqtyǵy, dástúr jáne strategiialyq áriptestiktiń kópjyldyq tarihy bailanystyrady. Sońǵy jyly eki jaqty saýda kólemi 30% - ǵa artyp, 2 mlrd. AQSh dollaryn qurady. Elbasylarymyz osy jylǵy taýar ainalymyn 3 mlrd. AQSh dollaryna deiin ósirip, 2020 jylǵa qarai munyń kólemin 5 mlrd. AQSh dollaryna jetkizýdi kózdep otyr. Ózderińiz biletindei, biyl Memleket basshysynyń Jarlyǵymen Túrkistan oblysy quryldy. Ortalyǵy Túrkistan shahary talai ǵasyrlar boiy Qazaq handyǵy men búkil túrki áleminiń saiasi jáne rýhani ómiriniń júregi boldy. Qazaqstan Prezidenti Túrkistannyń damýyna airyqsha kóńil bóledi. Búginde Túrkistan oblysy - qýatty ekonomikalyq áleýeti bar qarqyndy damyp kele jatqan aimaq. Óńirdiń iskerlik klimaty jergilikti kásipkerler úshin de, sheteldik investorlar úshin de tartymdy. Túrkistanda "TURKISTAN" arnaiy ekonomikalyq aimaǵy quryldy. Onda investorlarǵa artyqshylyqtar men jeńildikter qarastyrylǵan. Múmkindikti paidalana otyryp, Sizderdi bizdiń 1500 jyldyq tarihy bar ejelgi elordamyz - Túrkistandy jańǵyrtýǵa shaqyramyn. Biz oblysymyzdy damytýǵa baǵyttalǵan kez kelgen jobany jan-jaqty qoldaýǵa ázirmiz. Bul forým tiimdi alańǵa qyzmet etip, jańa iskerlik bailanystardy ornatý úshin jańa serpin beretinine senimdimin!", - dedi J.Túimebaev.
Sonymen qatar, aimaq basshysy búgingi tańda Túrkistan oblysynyń ekonomikasyn damytýdyń negizgi draiveri bolyp tabylatyn úsh basym baǵyt aiqyndalǵanyn atap ótti. Onyń birinshisi - týrizmdi damytý bolsa, ekinshisi - agroónerkəsiptik keshendi qoldaý jáne úshinshi basymdyq - logistika jáne tranzittik áleýet bolyp otyr.
Aita ketý qajet, Qazaqstan men Ózbekstan arasyndaǵy taýar ainalymy 2017 jyly 2 mlrd. AQSh dollaryn qurasa, bul 2016 jylmen salystyrǵanda 31,2% - ǵa ósti. Qazaqstannyń Ózbekstanǵa eksporttaǵan taýary 2017 jyly 1,3 mlrd. AQSh dollaryn qurap, 35% - ǵa ulǵaidy. Al Ózbekstannan Qazaqstanǵa importtalǵan taýarlar kólemi 735,2 mln. AQSh dollaryn qurap, 25,1% - ǵa artty.
Kezdesýge qatysýshylar búgingi forýmnyń tiimdi jáne jemisti yntymaqtastyqtyń jalǵasy bolatynyna senim bildirdi.
J.Túimebaev: Oblysymyzdy damytýǵa baǵyttalǵan jobalardy qoldaýǵa ázirmiz
