Búgin Parlament Májilisiniń tóraǵasy Nurlan Nyǵmatýlin jaqyn arada qabyldanatyn zańdar qai salalarǵa negizdeletinin aitty, dep habarlaidy "Ult aqparat".
«Jetinshi shaqyrylym Qazaqstan Táýelsizdigine 30 jyl, al Parlament qurylǵanyna 25 jyl tolatyn erekshe kezeńde óz jumysyn bastap otyr. Osyǵan bailanysty Memleket basshysy sessiianyń ashylýynda búgingi jetken jetistikterimizdi saqtap, odan ári damytý jolyndaǵy jańa maqsattar týraly aitty. Onyń ishinde áleýmettik-ekonomikalyq, quqyqtyq-saiasi baǵyttarǵa basa nazar aýdaratyn bolamyz», - dedi ol Májilisiniń jalpy otyrysynda.
Osy oraida N. Nyǵmatýlin atalǵan baǵyttar boiynsha tiisti zańdarmen Parlament qamtamasyz etetinin atap ótti.
«Sol úshin Memleket basshysy sessiianyń ashylýynda depýtattardan sapaly zańdardy talap etetinin erekshe atap ótti. Ol zańdar eń aldymen halyqtyń ómir sapasyn, bilim, densaýlyq saqtaý salalaryn jaqsartýǵa, áleýmettik qamtamasyz etýge, shaǵyn jáne orta biznesti qoldaýǵa yqpal etýge tiis. Sondyqtan bizdiń basty maqsatymyz – josparǵa sáikes óz ýaqytynda halyqqa qajetti, paidaly zańdardy qabyldaý», - dedi ol.
