Týrizm salasynyń qazirgi ahýalyn túbegeili ózgertetin ýaqyt keldi. Bul jumystardy Ulytaýdai qasietti jerlerden bastaýymyz qajet, dedi Qazaqstan Prezidenti Qasym-Jomart Toqaev "Ulytaý-2019" halyqaralyq týristik forýmy barysynda.
"Ulytaý – ultymyzdyń altyn besigi, taǵylymdy tarihymyzdyń kýási. Qalyń qaýym osy kieli ólkede el bilegen handardy aq kiizge kóterip, taqqa otyrǵyzǵan. Sondyqtan biz Ulytaý jerine han ordasy, qazaq jeriniń kindigi dep, erekshe qurmetpen qaraimyz. Bir-birin daýǵa qisa da, jaýǵa qimaǵan halqymyz bereke-birlikti bárinen joǵary qoiǵan. Babalardan qalǵan salt-dástúrlerdi búgingi urpaq laiyqty jalǵastyrýy tiis", - dedi ol.
Prezident "Ulytaý" ulttyq tarihi-mádeni jáne tabiǵi murajai qoryǵy el igiligine ainalǵanyn atap ótti. Ulytaý aýdanynyń ortalyǵynda Qazaq handarynyń alleiasy boi kóterdi. Endi elimizdiń osyndai baǵa jetpes bai murasyn ózge jurtqa tanytýdyń jańasha joldaryn oilastyrýymyz kerek.
"Uly hannyń úlken uly – Joshynyń mazary qazaq jerinde turǵanyn búginde elimizdegi jáne sheteldegi jurtshylyqtyń kóbi bile bermeidi. Ata-babalardyń amanatyna adal bolý – bizge syn. Biz Altyn ordanyń negizin qalaǵan Joshy hannyń esimin ulyqtaýdy mindetti túrde qolǵa alýymyz qajet. Onyń tarihi tulǵasyna álemniń nazaryn aýdaryp, kesenesin mádeni týrizm nysanyna ainaldyrý – óte mańyzdy mindet", - dedi Memleket basshysy.
Toqaevtyń aitýynsha, Ulytaý halyqaralyq deńgeidegi etnografiialyq týrizmniń ortalyǵy bolýy tiis. Bul jumystar Altyn ordanyń 750 jyldyǵyn merekeleý aiasynda bastalýy qajet, dedi Prezident.
"Qazirgi otandyq týrizm indýstriiasy – kenje qalyp kele jatqan sala. Jyl saiyn qyrýar qarajat salsaq ta, bul sala tolyqqandy damymai otyr. Týrizm salasynyń qazirgi ahýalyn túbegeili ózgertetin ýaqyt keldi. Bul jumystardy Ulytaýdai qasietti jerlerden bastaýymyz qajet", - dedi Toqaev.
Memleket basshysy Ulytaý aimaǵy mindetti túrde Qazaqstannyń týrister tartý kartasynyń aldyńǵy qatarynda bolýy tiis ekenin aitty. Buryn jobalanǵan "Ulytaý" ulttyq tabiǵi parkin qurý máselesin júzege asyrý kerek.
"Biyl munda týrister úshin arnaiy ortalyq ashylýy tiis. Ulytaý týristik mekenge, demalys aimaǵyna, uly babalarǵa taǵzym etý ortalyǵyna ainalýy tiis. Bul óńirge qazaq tarihynyń simvoly bolatyn eskertkish-ansambl ornatý qajet. Qasietti Ulytaý – ultty uiystyrýdyń, eldi biriktirýdiń negizi. Bul bastamalar halqymyzdyń ulttyq biregeiligin nyǵaita túsýge oń yqpal etedi dep senemin. Ulytaýdyń tarihy men taǵylymyn jastar tárbiesi men otanshyldyqty, ishki týrizmdi damytýǵa paidalaný kerek", - dedi Toqaev.
