Foto: Unsplash
Elordada derti dendegen naýqastarǵa oiyna kelgenin istegen stýdentke qatysty sot uzaqqa sozylyp ketti. Bir jylǵa jalǵasqan protseste búgin de úkim oqylǵan joq. Jábirlenýshilerdiń týystary aiyptalýshy jazadan ońai sytylyp kete me dep alańdaidy. Bul týraly KTK arnasy habarlady.
Adam nanǵysyz sumdyq jaǵdai jergilikti hospista bolǵan. Onda taǵdyrynan teperish kórip, aiyqpas dertpen kúresip jatqan naýqastar jatady. Sol jerde taǵylymdamadan ótken stýdent jigit patsientterdi basynan urǵan, qolymen nuqyǵan, eń soraqysy, múgedekterdiń jórgekterin ashyp, ondaǵy nájisti jeýge májbúrlegen. Ólimmen arpalysyp jatqandardyń basyna paket kigizgen, odan qalsa, jerge jatqyzyp tepken. Sonyń bárin videoǵa túsirip, jora-joldastary otyratyn arnaiy chatqa jiberip otyrypty.
Al dostary baibalam salýdyń ornyna, kerisinshe qoldap-qolpashtap, áleýmettik jelige taratyp jibergen. Tóbesinen jai túskendei kúi keshken jábirlenýshilerdiń týystary sotqa birden júgingen. Alaida istiń jyljityn túri joq.
Advokat Merhat Ahmetoldinniń aitýynsha, jasóspirim bala medakademiiada oqidy. WhatsApp messenjeri chatyn ashyp, ony "Sidik" dep ataǵan.
"Sol chatqa óziniń aralasyp júrgen jora-joldastary qosylady. Solarǵa osyndai videolar túsirip, aqparat taratqan. Sondai-aq qazir aitylmaǵan aqparat bar. Bul bala jalǵyz ózi istemegen. Onyń qasynda taǵy bir stýdent bolǵan. Oǵan qatysty da bólek qylmystyq is ashylady degen aqparat bar", - deidi Ahmetoldin.
Hospis basshylyǵy jelide jeldei esken videodan keiin dárigersymaqty birden jumystan shyǵaryp jiberipti. Qyzmetke alarda boiynan kúdik týǵyzar esh belgi kórmegen edik dep otyr. 21 jastaǵy stýdent kishipeiil bolyp kóringen, naýqastardyń ishi-baýyryna kirip turǵan. Al qylmysqa qatysy bar ekinshi stýdent týraly eshteńe aitpai otyr.
"Bolashaq dáriger ǵoi, praktikamdy osynda ótkizemin degen soń, biz ony qabyldadyq. Bizde jumys istegen kezde kishipeiil, onyń adamǵa degen qarym-qatynasynan, sóileý mánerinen psihologiialyq ózgeristerin baiqaǵan joqpyn", - dep atap ótti klinika direktory Gúlmira Kniazbekova.
Paleativti ortalyqtan ońai qutylǵan stýdent-dáriger ozbyrlyǵyn basqa klinikada jalǵastyrǵan. Munda da taǵdyry onsyz da mańdaiynan sipamaǵan balalardy uryp-soqqan. Tipti seksýaldyq sipattaǵy qorlyq kórsetipti.
Qazirgi kezde 10 otbasy stýdenttiń ústinen shaǵym túsirgen. Biraq sot otyrystary bir jylǵa sozylyp ketti. Osy ýaqyt ishinde derti dendegen beseýi o dúnielik bolǵan. Stýdenttiń kinási dáleldense, 7 jylǵa bas bostandyǵynan aiyrylýy múmkin.
