Ál-Farabi atyndaǵy Qazaq ulttyq ýniversitetiniń himiia jáne himiialyq tehnologiia fakýlteti dekanynyń oqý isi jáne áleýmettik qyzmet jónindegi orynbasary Leila Kýdreeva «Nur Otan» partiiasynyń kezekten tys HHI sezine qatysty pikir bildirdi, dep habarlaidy QazAqparat.
Onyń aitýynsha, qarapaiym halyq, ásirese, qańtardaǵy oqiǵadan keiin bilik partiiasynyń sheshimin biraz tolǵanyspen kútti.
«Prezident «Nur Otan» partiiasynyń qoǵamdaǵy rólin arttyrý asa mańyzdy ekenin atap ótti. Sonymen qatar, syn saǵatta partiianyń alyp kúshi paidalanbai qalǵanyna ókinish bildirdi. Memleket basshysy «qańtar qasireti» jastardyń áleýmettik- ekonomikalyq turǵyda beiimdelýinde jibergen kemshilikti anyq kórsetkenin basa aitty», - deidi Leila Kýdreeva.
Ustazdyń sózinshe, búgingi kúni qoǵam múshelerine belsendilik jetispeidi.
«Shynynda da, bizge, jalpy qoǵam múshelerine belsendilik jetispeidi. Bir-birimizdiń máselemizge bas aýyrtqymyz kelmeidi. Qazir qos diplomy bar jastardyń deni jumyssyz. Jumysy bolmaǵan soń olar jaman ádetke áýes keledi. Óz basym Prezidenttiń «jastardy tehnikalyq mamandyqtarǵa baýlý kerek» degen usynysyn qoldaimyn. Óitkeni bizdiń qoǵam bilikti injenerlerge, tehnikterge, taǵy basqalaryna óte zárý. Áli kúnge deiin munaigaz sektory kásibi tehnik mamandardy syrttan aldyrady. Osyndai kemshilikterdi joiý úshin otandyq mamandardy ózimiz molynan, qajettilikti óteitindei deńgeide daiarlaýymyz kerek. Oǵan bizdiń eldiń múmkinshiligi de, qýaty da jetedi. Tek elimizdiń bolashaǵy jastardyń taǵdyryna bei-jai qaraýdan arylýymyz kerek. Sonda ǵana naqty nátijege jetemiz», - deidi spiker.
