Otandyq JOO-daǵy bilim berý baǵdarlamalarynyń 73 paiyzy jumys berýshilerdiń suranysyna sai kelmeidi. Bul týraly QR BǴM Bilim jáne ǵylym salasyndaǵy baqylaý komitetiniń tóraǵasy Gúlzat Kóbenova málim etti, dep habarlaidy "Ult aqparat".
«Biyl QR Bilim jáne ǵylym ministrliginiń tapsyrysy boiynsha, «Atameken» UKP joǵary oqý oryndarynyń bilim berý baǵdarlamalarynyń reitingisin daiyndady. Búgingi kúni bilim berý baǵdarlamalary byltyrmen salystyrǵanda ádistemesi ózgerdi. Jalpy, reitingte 109 joǵary oqý ornynan 2000 bilim berý baǵdarlamasy qamtyldy», - dedi G. Kóbenova Ortalyq kommýnikatsiialar qyzmetindegi baspasóz máslihatynda.
Onyń sózine qaraǵanda, reiting júrgizý barysynda negizgi 17 kriterii nazarǵa alyndy. Olardyń ishinde túlekterdiń jumysqa ornalasýy, olardyń ortasha jalaqysy, oqý aiaqtalǵan soń jumys izdeý uzaqtyǵy sekildi jaǵdailar zerdelendi.
Belgili bolǵandai, elimizdiń óńirlerinen 700-den astam sarapshy qatysyp, olar 6 myńnan astam ózderiniń qorytyndysyn usyndy.
«Onyń nátijesine toqtalsaq, joǵary oqý oryndary bilim berý baǵdarlamalarynyń 73 paiyzy jumys berýshilerdiń kóńilinen shyqpai otyr», - dedi komitet basshysy.
Júrgizilgen reiting barysynda túlekterdiń jumysqa turýy 74 paiyzdy quraityny anyqtaldy. Olardyń ortasha eńbekaqysy 103 myń teńgeden asady.
Aita keteiik, «Atameken» Ulttyq kásipkerler palatasy eki jyl qatarynan QR Bilim jáne ǵylym ministrligi men «Eńbek resýrstaryn damytý ortalyǵy» AQ-men birlesip, otandyq joǵary oqý oryndarynyń bilim berý baǵdarlamalaryna táýelsiz baǵalaý júrgizip keledi.
