Almaty oblysyndaǵy Jońǵar Alataýy memlekettik ulttyq tabiǵi parkiniń aýmaǵy 200 myń gektarǵa keńeimek. Qazirdiń ózinde park 360 myń gektarǵa jýyq, dep habarlaidy "Ult aqparat".
On jyl buryn ashylǵan ulttyq parkte qazir sútqorektilerdiń - 49, qustyń 170 túri anyqtalǵan. 7 sútqorekti janýar Qazaqstannyń qyzyl kitabyna engen. Olardyń qatarynda qar barysy, Tian-shan qońyr aiýy, Túrkistan sileýsini bar. Park qyzmetkerleri jýyrda qar barysyn kishi Basqan ózeni aǵatyn shatqaldyń tómengi jaǵynan kórip qalǵan. Osy kishi Basqan kardonynyń inspektory Kárim Sátbaevtyń aitýynsha, túz taǵylaryn tek fototuzaqtan ǵana emes, óz kózimen de jii baqylaityn bolyp júr.
«Sútqorektiler baǵyty boiynsha tek qana barys, túrkistan sileýsini ǵana emes, maral, elik, Tian-shan qońyr aiýy, tas sýsary, taýeshkilerdiń qanshama fototuzaqqa túsken sátteri bar. Olardyń barlyǵy ǵylymi-aqparat monitoring bólimi úshin ǵana emes, Jońǵar Alatýy úshin úlken jetistik bolyp sanalady»,- deidi fototuzaqtardy quratyn parktiń ǵylymi qyzmetkeri Janarbek Moldahan.
Biyl park qyzmetkerleri týristik baǵyttar sanyn 13-ke jetkizgen. Olardyń ishindegi eń tanymaly Jasylkól men Shýmskii shyńy. Sondai-aq jańadan «At tapqan» jáne «Jamantas» degen baǵyttar ashyldy.
Park basshysy Marat Qabievtyń aitýynsha, bolashaqta erekshe qorǵalatyn aýmaq 200 myń gektarǵa deiin keńeiedi. Bul óz kezeginde parkti mekendeitin qustar men janýarlar qoryn eselep, ondaǵy ósimdikter álemin saqtap qalýǵa múmkindik bermek.
