Áleýmettik jelide Talǵar aýdanyndaǵy mektepterdiń birinde synyp jetekshisi ata-analardan jóndeýge aqsha berýdi suraǵan aýdiojazba qyzý talqyǵa tústi, - dep habarlaidy Tengrinews.kz.
Aýdiojazbadaǵy derekterge qaraǵanda, oqý jylynyń sońynda kabinetke shaǵyn jóndeý jumystaryn júrgizbekshi. Synyp jetekshisi ata-analardan bir balaǵa myń teńgeden jinaýdy suraidy.
Jelide jariialanǵan ata-analardan aqsha suraǵan muǵalimniń túsiniktemesi de paida boldy. Ol ata-analardan aqsha suramaǵanyn tek demeýshilik kórsetýdi usynǵanyn aitady.
"Men osy kabinette oqityn synyptyń synyp jetekshisi Arzieva N.N., ata-analar jinalysyn ótkizý kezinde ata-analardan demeýshilik kómek kórsetýdi ótindim. Balalar oqý jyly boiy osy kabinette oqydy. Jyl sońynda jóndeý jumystaryn jasasaq balalardyń múddesi úshin, óitkeni kelesi oqý jylynda biz osy kabinette oqýdy jalǵastyramyz. Jóndeýge aqsha jinaý týraly áńgime bolǵan joq, ásirese oqýshylar arasynda", - dedi muǵalim.
2018 jyly qazirgi bilim ministri Ashat Aimaǵambetov vitse-ministr bolyp turǵanda bilim salasynyń basshylary men mektep ákimshiligine bilim berý uiymdarynda bopsalaýǵa, ata-analardan aqsha jinaýǵa jol bermeýdi qatań eskertken bolatyn. Osy jyldar ishinde Qazaqstannyń túkpir-túkpirinde ondaǵan mektep direktorlary men muǵalimderi qyzmetterinen shettetildi.
Talǵar aýdanynyń bilim basqarmasy shýly aýdiojazbaǵa qatysty pikir bildirdi.
"Bul - Besaǵash aýylyndaǵy № 29 mektep. Direktordan, synyp jetekshisinen túsindirme hat aldyq. Synyp jetekshisi eshkimnen aqsha suramaǵanyn tek demeýshilik kómek kórsetýdi ótingen aitady. Al muǵalim aýdiojazbany montajdalǵan deidi", - deidi Talǵar aýdandyq bilim bóliminiń basshysy Lázzat Qurmanbaeva.
