Qazaqstan Prezidentiniń Joldaýynda eńseni kóteretin ekonomikadan ult qundylyǵyna deiin aityldy. Mundai pikirdi Nur-Sultan qalalyq máslihatynyń depýtaty Qaraqat Ábden bildirdi, dep habarlaidy QazAqparat.
«Keshe Parlament palatalarynyń birikken otyrysynda Prezidentimiz Qasym-Jomart Toqaev birqatar óte mańyzdy, ótkir máseleler kóterdi dep oilaimyn. Elimizdiń eńsesin kóteretin ekonomikadan bastap bilim, ǵylym, densaýlyq, adam quqyǵyn qorǵaý, bala tárbiesi men ortaq ulttyq qundylyqtardy saqtaý jaiyn túgeldei naqty qamtydy. Kóp máseleler búgingi qoǵamda kóterilip, talai talqylanyp júr. Olardy Prezident birinen soń birin tizbektep aitqanda, kóbisi Memleket basshysynyń shyn máninde eldiń sózine qulaq asatynyn baiqady. Aldymen adam quqyǵyn qorǵaý máselesine keleiik. Qasym-Jomart Toqaev osy turǵyda jańa shara qabyldaý qajettigin shegelep aitty. Ásirese, internettegi balaǵa jasalǵan qysymdar, mazaq etý siiaqty oqiǵalar búginde óte qaiǵyly jaǵdailarǵa ákep soǵatynyn jetkizdi. Bala túgili eresek adamdarǵa qarsy jazylyp júrgen balaǵat sózderdi kóterýdiń ózi aýyr ekenin aitqym keledi», - dedi ol.
Osy oraida máslihat depýtaty Prezidenttiń internettegi beisaýyt, negizsiz jazbalarǵa zań turǵydan tosqaýyl qoiýdy tapsyrýyn tolyq qoldaityndyǵyn basa aitty.
«Bala demekshi, sábi súiý múmkindigine jete almai otyrǵan talai otbasynyń baǵy ashylaiyn dep tur. Prezidentimiz «Ańsaǵan sábi» arnaiy baǵdarlamasyn jariialap, búldirshinge zar bolyp otyrǵan otbasylarǵa arnaiy kvota sanyn 7 esege kóbeitýdi tapsyrdy. Memleket basshysynyń bul sheshimi bala úshin ajyrasý sanyn qysqartyp, meditsinadaǵy EKO salasyna úlken dúmpý ákeleri sózsiz. Mundai múmkindik basqa elderde joq ekeni, ózge memlekettegi otbasylar qaradai qarajatyn jinap, aýrýhana aralaýmen kúnderi ótip jatqany anyq», - dedi Qaraqat Ábden.
Onyń atap ótýinshe, Prezidentimiz neni qysqartyp, neni kóbeitý qajettigin naqty, dál halyqtyń muqtajymen bailanystyryp aityp berdi.
«Ásirese, memlekettik qyzmetkerler sanyn azaitý qajettigi ýaqyt talabymen sai kelgen qadam dep oilaimyn. Basymyzdan ótip jatqan pandemiia memlekettik apparattyń ózi qalai yqshamdala alatynyna kóz jetkizdirdi. Prezidenttiń bul sózine az bolyp, saz is atqaryp otyrǵan halyq ta qoldaityny anyq. Az ýaqytta tsifrly damýymyzǵa da aitarlyqtai qan júreiin dep tur. Joldaýda aldymen áleýmettik kómektiń barlyǵy túgeldei sandyq formatqa aýystyrylady delindi. Shyn máninde, halyq kómekti tizerlep turyp, jalynǵandai qinalyp alǵanyn bilemiz. Áli de azamattar qujattaryn jetkizemin dep talai esikti tozdyryp otyr. Sol úshin ýaqytynan keshigip, almai otyrǵandary qanshama. Prezidenti olardyń da múddesin qorǵap, ádildikti tsifrlandyrý arqyly rettemek», - dedi ol.
Onyń atap ótýinshe, onlain jiyn degenge de etimiz úirendi.
«Karantin kezinde máslihat depýtattarymen biraz otyrysty ekran arqyly ótkizdik. Biraq Qasym-Jomart Kemeluly aitqandai, jiynymyzdyń barlyǵy birdei ashyq ótpeidi. Ol úshin aldymen máslihattardy qajetti qurylǵylarmen qamtamasyz etý máselesi bar ekenin aitqym keledi. Ózimiz barynsha áleýmettik jeliler arqyly aqparat taratýǵa tyrysamyz. Alaida ol da azdyq etip otyrǵanyn Memleket basshysynyń ózi aityp otyr. Eger barlyq ótetin jinalystar tikelei halyqqa kórsetiletin bolsa, azamattar ózderi daýys berip, sailaǵan depýtatynyń atqaryp otyrǵan jumysyn, qanshalyqty belsendi ekenin kózimen kórýge jaǵdai týar edi. Odan basqa, halyqpen keri bailanys ta áldeqaida artary anyq. Ádette depýtattar tek azamattardy qabyldaý kezinde ǵana olardyń muń-muqtajyn bilip otyrady. Ashyq otyrystarǵa turǵyndar da qatysyp, talqylanyp otyrǵan máselelerdi bilip otyrar edi. Sondyqtan aitylǵan usynys óte oryndy dep aita alamyn», - dedi máslihat depýtaty.
Sonymen qatar ol shaǵyn jáne orta biznes ókilderine berilgen zor múmkindikterge toqtaldy.
«Jaqynda ǵana osy máseleni kótergenmin. Men oǵan áielder ainalysyp otyrǵan bizneske erekshe mán berilse eken dep qosar edim. Árine, biznes jynysqa bólinbeitini haq. Biraq, osy joly áielder arqalap júrgen is erekshe qoldaýdy qajet etip otyr. Jerdiń sheteldikterge satylmaýy, jalpy jerdi ikemdeýdiń túrli joldary da aityldy bul joly. Prezident agroónerkásipti jańǵyrtýǵa bólingen erekshe nazardy men de qup kóremin. Jańa ulttyq joba qala mańyndaǵy aýyldar men kishigirim qalashyqtarǵa jan bitiredi degen úmittemin. Sonda ǵana azamattar úlken megapolisterge qulshynbai, otyrǵan jerin kórkeitýge, týyp ósken mekenin damytýǵa tyrysar edi. Ekonomika, innovatsiia kerek árine, biraq bizge bárinen tez aýyl sharýashylyǵymyz kóbirek paida men molshylyq beredi. Tek oǵan qajetti kóńil men qarajat jetip otyrsa», - dep túsindedi sózin Qaraqat Ábden.
