Fýtboldan ulttyq quramamyz sońǵy jarym jyldyqta jankúier qaýymdy jalt qaratqan bolatyn. Komanda oiynyna qan júgirip, barlyǵymyzdyń kóńilimizde fýtbolda da tolaǵai tabystarǵa jetemiz be degen úmit oty mazdaǵan edi. Obaly neshik, Talǵat Baisýfinov bastaǵan bizdiń jigitter birneshe sátti oiyndarynyń arqasynda FIFA reitinginde 96-shy orynǵa taban tiredi. Sóitip, qazaq fýtboly atasynda kórmegendi botasynda kórip, bir jasap qalǵan edik.
Eýropanyń eń azýly komandalarynyń biri Polshamen bolar oiyn aldynda aiyr qalpaqty aǵaiyndarymyzben “joldastyq” kezdesý ótkizip júrgenimizge jol bolsyn! Qyrǵyz ben qazaq fýtboly ózara kezdesýge kende emes edi. Kerek deseńiz ol kórshilerimizdi bes gol soǵyp ta, jeti gol soǵyp ta utqanbyz. “Altyn shyqqan jerdi belden qaz” degen ádemi maqal bul jerge jaraspas, bundaidy qazaq “It toiǵan jerine toǵyz barady” - deitin edi.
Ókinishtisi, osyǵan deiin bizdiń quramamen jeti ret kezdesip, jeńistiń dámin tata almai júrgen qyrǵyz quramasy erlik jasady. Ózderin ońai oljaǵa ainaldyryp júrgen Qazaqstan quramasyn 2:0 esebimen utyp ketti. Bul kezdesýdi taǵy bir jeńis úshin emes, qyrǵyz aǵaiynnyń bir jeńis toiyn toilaǵanyn kórý úshin ótkizdik pe, kim bilsin?!
Meili, qalai bolsada kezdesý ótti. Oiyn esebi biz úshin qatty mańyzdy emes, sebebi, bul tek - joldastyq kezdesý. Mańyzdysy oiyn barysy men komandaǵa ákeler paida-ziiany ǵana. Bul jeńilis Talǵat Baisýfinov komandasynyń tórt oiyn jeńilissiz seriiasy syndy ańyzdyń kúlin kókke ushyrdy. Sóitip, Qazaqstan quramasyna ózderiniń Braziliia nemese Germaniia emes ekenin eskertti. Endi esterin jiyp, belderin býmasa Polsha komandasy taptap ketedi. Óitkeni, Robert Levandovski men Arkadiýsh Milik qyrǵyz birinshiliginde nemese qytai chempionatynda dop teppeidi. Olar Eýropanyń top chempionattarynda top bastaǵan surmergender!
FIFA reitinginde 16-shy orynda turǵan, keshe ǵana ótken Eýropa chempionatynda shirek finalǵa deiin shapqan Polsha quramasyna qarsy daiyndyqty dál osylai - Aziia qurlyǵynyń kenjeleriniń biri qyrǵyzdarmen oinap pysyqtaýdyń qansha jóni bar ekenin aitý qiyn.
Tym quryǵanda Ýkraina, Vengriia, Serbiiamen kelissóz júrgizip kórse qaiter edi? Armeniianyń Chehiiamen kezdeskenin, tipti, Grýziianyń Ispaniiamen oinaǵanyn kórip júrmiz ǵoi. Olar qazaq dalasyn alyssynsa, ózimiz-aq baraiyq solardyń eline. Onsyzda barlyq joldastyq kezdesýlerimizdi syrt alańda ótkizip júrmiz ǵoi. Syrt alańda demekshi, biz biylǵy jylǵy tórt joldastyq oiynnyń barlyǵyn syrt alańda ótkizdik. Ne úshin óz elimizde birer kezdesý ótkizip, daiyndyq jasamaimyz?
Eger álem chemionatyna baramyz dep maqsat qoiatyn bolsaq, soǵan laiyq jumys jasalýy kerek. 4 qyrkúiek “Astana-Arenada” Polshany qabyldaimyz eken, endeshe, búgin Bishkekte qyrǵyzdarmen emes Astanada joǵaryda atalǵan komandalardyń birimen oinaǵanymyz oń bolar edi. Olar kelmegen kúnniń ózinde kórshiles Belorýssiiany nemese Túrkiiany shaqyryp kórý kerek edi. Kerek bolsa qytailarsha búkil shyǵynyn kóterip, jol qarajattaryn tólep. Osylai jaǵdai jasap bergende ǵana komanda oiynshylarynan oń nátije talap etýge bolady.
Qyrǵyzdarǵa qarsy ótken kezdesý qurama sapyna ózgeris kerek ekenin, Polshaǵa qarsy bulai oinaýǵa bolmaitynyn kórsetti. Negizgi quram tómendegidei boldy: Qaqpada - David Loriia. Qorǵaýshylar tórttigi - Gafýrjan Sýiýmbaev, Sergei Malyi, Viktor Dmitrenko, Eldos Ahmetov. Ortalyq alańda oinaǵan Maqsat Baijanov, Samat Smaqov, Islambek Qýat, Abzal Beisebekov tórttigi shabýyldan góri qorǵanysqa bir taban jaqyn oiynshylar. Bapker bul tórteýin qatar shyǵaryp, shabýyl shebin álsiretip, qarsylas qorǵaýshylarynyń jumysyn jeńildete tústi. Shabýylda - Sergei Hijnichenko jáne oǵan Baýyrjan Islamhan kómektesti. Maqsat Baijanov pen Viktor Dmitrenko komandaǵa kómektesýge tym daiyn emes sekildi, Smaqovta sál sharshańqy kórindi. Dmitrenkonyń Polshaǵa qarsy oiynǵa shyqpaityny sózsiz. Pavlodarlyq qorǵaýshy Eldos Ahmetovtyń ne sebepten negizgi quramda shyqqany túsiniksiz. Maýsym aiynan beri jaraqatyna bailanysty "Ertis" sapynda birde-bir kezdesýde alańǵa shyqpaǵan edi ǵoi. Sonymen qatar, Smaqov pen Baijanovty da oilastyrý kerek sekildi. Qansha ardager oiynshylar bolǵanymen, ekeýi de biylǵy maýsymdy sátti ótkizip júrgen joq. Oiyndy jiti baqylaǵan Baisýfinov bastaǵan bapkerler toby búgingi qatelikterden sabaq ala otyryp, jaýapty kezdesýge qarsy jaqsy taktika daiyndaidy dep senemiz.
Árine, bul oiynda túrli sebeptermen ulttyq quramamyzǵa Iýrii Logvinenko, Serikjan Mýjikov, Tańat Nóserbaev, Ulan Qonysbaev kómektese almady. Sonymen qatar, qosalqy quramda otyryp, tek oiynnyń ekinshi jartysynda shyqqan Dmitrii Shomko, Azat Nurǵaliev, Ashat Taǵybergen bar.
Sóz sońynda joldastyq kezdesýdi ár qurama óz paidasyn kózdei otyryp, alda bolatyn resmi kezdesýlerge daiyndyq retinde ótkizetinin, onyń aty zatyna sai tek “joldastyq” kezdesý ǵana bolmaý kerek ekenin eskertkim keledi.
Qýanysh QAPPAS,
Ult portaly
