2019 jyldyń 1 qańtarynan bastap áleýmettik mańyzy bar baǵyttarǵa tarifter qymbattamaǵan. Bul týraly «Jolaýshylar tasymaly» AQ baspasóz qyzmeti málimdedi, dep habarlaidy "Ult aqparat".
Birqatar BAQ-ta 2019 jyly áleýmettik mańyzy bar tarifterdiń kóterilgeni týraly aqparatqa bailanysty «Jolaýshylar tasymaly» AQ habar taratady.
«Tarifterdiń ósýi/kemýi týraly sheshimdi ýákiletti organ kórsetilgen esepterge bailanysty qabyldaidy. Osyǵan orai, 2019 jyldyń 1 qańtarynan bastap tarifter qymbattamaǵan», - dedi baspasóz qyzmeti.
Sondai-aq, Qazaqstan Respýblikasy Indýstriia jáne infraqurylymdyq damý ministrligi Kólik komiteti men «Jolaýshylar tasymaly» AQ arasynda jasalǵan jolaýshylardy tasymaldaýǵa bailanysty tasymaldaýshynyń shyǵyndaryn uzaqmerzimdi sýbsidiialaý týraly kelisimge sáikes, áleýmettik mańyzy bar baǵyttarǵa jolaýshylardy tasymaldaý qyzmetine tarifterdiń jyl saiyn ósetini qarastyrylǵanyn atap ótti.
«Sonymen birge, Qazaqstan Respýblikasy Indýstriia jáne infraqurylymdyq damý ministrligi Kólik komitetiniń 2019 jylǵy 9 qyrkúiektegi № 28-28-9/2920 hatyna sáikes, «Jolaýshylar tasymaly» AQ-ny qurý úshin 2019 jylǵy 21 qyrkúiekten bastap áleýmettik mańyzy bar 28 baǵyt boiynsha tarifterdi 10%-ǵa ósirý kelisildi. Jalpy, «Jolaýshylar tasymaly» AQ-nyń 39 baǵyty memlekettik jáne jergilikti biýdjetten sýbsidiialaýǵa jatady», - delingen habarlamada.
